Ўзбекистон Республикаси Президенти томонидан имзоланган Қонун (ЎРҚ-1018-сон, 13.01.2025 й.) билан «Давлат божи тўғрисида»ги Қонунга қатор муҳим қўшимчалар ва ўзгартиришлар киритилди. Ушбу ўзгартиришлар тадбиркорлик субъектлари ва юридик шахслар учун янги енгилликларни назарда тутган.

Маълум қилинишича, маъмурий-ҳудудий бирликлар тузилганлиги ёки тугатилганлиги, уларнинг чегаралари ёки бўйсунуви ўзгартирилганлиги натижасида тадбиркорлик субъектларининг ва бошқа юридик шахсларнинг жойлашган ери (почта манзили) ўзгарганда, улар қайта давлат рўйхатидан ўтказганлик учун давлат божини тўлашдан озод этилади. Бу ўзгариш тадбиркорлик субъектларига қўшимча молиявий юкламалардан қочиш имконини беради ва уларнинг фаолиятини енгиллаштиради.

Қонунга киритилган яна бир муҳим қўшимчага кўра, мажбурий суғурта шартномаларидан келиб чиқадиган даъволар бўйича суғурта қилдирувчилар давлат божини тўлашдан озод этилади. Бунда суғурта қилдирувчилар, шу жумладан суғурталанган шахслар, наф олувчилар ва жабрланувчилар, фуқаролик ишлари бўйича судларда ва иқтисодий судларда мажбурий суғурта шартномалари билан боғлиқ даъволарни кўриб чиқишда давлат божини тўламайдилар.

Мазкур қонун фуқароларнинг манфаатларини ҳимоя қилишга қаратилган бўлиб, суғурта билан боғлиқ низоларни ҳал этишни енгиллаштиришга хизмат қилади. Шунингдек, у тадбиркорлик фаолиятини ривожлантириш ва юридик шахслар учун янада қулай ҳуқуқий муҳит яратишга қаратилган.

Қонун расмий эълон қилинган кундан бошлаб кучга киради. Бу ўзгаришлар тадбиркорлар ва суғурта билан боғлиқ фуқаролар учун қонунчиликда янги имкониятларни очади ҳамда уларнинг молиявий манфаатларини таъминлайди.