Иллюстратив фото

Тинчлик бўйича Нобель мукофоти Венесуэла мухолифати етакчиси Мария Корин Мачадога берилди.

Таъкидланишича, у «Венесуэла халқининг демократик ҳуқуқларини илгари суриш йўлидаги тинимсиз меҳнати ҳамда диктатурадан демократияга адолатли ва тинч йўл билан ўтиш йўлидаги кураши учун» мукофотга сазовор бўлган.

“У кўп йиллар давомида Венесуэла халқининг озодлиги учун курашди”, дейилади Нобель қўмитаси ахборотида.

Қўшимча қилинишича, Мачадо 2024 йилги сайловлар олдидан президентликка мухолифат номзоди бўлган, бироқ режим “унинг номзодини қўйишга тўсқинлик қилган”.

Жума куни Буюк Британиянинг “The Telegraph” газетаси қўмита сўнгги дақиқада бошқа лауреатни танлаши мумкинлигини хабар қилди.

Совринга даъвогарлардан бири АҚШ президенти Дональд Трамп бўлиб, букмекерлар унинг имкониятини 3 фоизга баҳолаган.

Шу билан бирга, “Bloomberg” АҚШ президенти тинчлик бўйича Нобель мукофотини олмаса Норвегия иқтисодий ва дипломатик оқибатларни кутаётганини таъкидлади.

Агентлик таъкидлаганидек, пайшанба куни кечқурун Трампнинг ўғли Эрик Х ижтимоий платформасидаги ўз кузатувчиларидан «агар сиз Трамп Тинчлик учун Нобель мукофотига лойиқ деб ҳисобласангиз, ретвит ёзинг» дея сўради. Тахминан бир вақтнинг ўзида Оқ уйнинг Х расмий аккаунтида Трампнинг сурати жойлаштирилди ва уни “Тинчлик президенти” деб атади. Бунга жавобан Норвегия Нобель қўмитаси Трампнинг босими “бефойда” эканини аниқ кўрсатди, дейилади “Блоомберг” ахборотида.

Бунгача америкалик олимлар Жон Кларк, Мишель Деворе, Жон Мартинис квант механикасидаги кашфиётлари учун физика бўйича, америкалик олимлар Мери Брунков, Фред Рамсделл ҳамда япон олими Шимон Сакагучи иммунитет тизимининг тананинг ўз ҳужайраларига ҳужум қилишига нима тўсқинлик қилишини кашф этгани учун физиология ёки тиббиёт бўйича,

Япониялик Сусуму Китагава, австралиялик Ричард Робсон ва америкалик Омар Ягхи юқори ғовакли материалларнинг янги синфи — металлорганик каркасларни ишлаб чиққанликлари учун кимё бўйича, венгр ёзувчиси Ласло Краснахоркай “қиёмат даҳшати шароитида санъатнинг кучини яна бир бор тасдиқлаган ишончли ва башоратли ижоди учун” адабиёт бўйича 2025 йилги Нобель мукофотига сазовор бўлганди.