Botir MADIYOROV/“Xalq soʻzi”. Rishton tumani “Yuqori Beshkapa” mahalla fuqarolar yigʻinidagi 61-umumtaʼlim maktabi uchun 240 oʻrinli yangi bino qurilib, foydalanishga topshirildi. Maktabning 2009-yili qurilgan binosi 180 oʻringa moʻljallangan boʻlib, bu yerda 400 nafar oʻquvchi ikki navbatda taʼlim olayotgan edi. Davlat investitsiya dasturi asosida 2 milliard 681 million soʻm mablagʻ evaziga maktab uchun 2 qavatli 240 oʻquvchi oʻrniga ega yangi bino bunyod etildi.

Shu munosabat bilan oʻtkazilgan tantanali tadbirda Rishton tumani hokimi, sektor rahbarlari, jamoatchilik faollari hamda ota-onalar ishtirok etdi.

Keyingi yillarda yurtimizda taʼlim tizimini isloh qilish, ayniqsa, umumiy oʻrta taʼlim maktablari uchun yangi binolar qurish, ularning moddiy-texnik bazasini mustahkamlash, taʼlim-tarbiya jarayonlariga zamonaviy pedagogik texnologiyalarni joriy etish borasida izchil saʼy-harakatlar olib borilmoqda. Zamonaviy sharoitlarga ega boʻlgan ushbu taʼlim muassasasida ham kelajagimiz vorislari uchun barcha qulayliklar muhayyo etildi.

— Quvonarlisi, bugun mazkur taʼlim maskanida «Tashabbusli byudjet« loyihasi doirasida qurib bitkazilgan sport maydonchasi va maʼnaviyat maskani ham ish boshladi, — deydi Rishton tumani hokimi oʻrinbosari Zarifjon Umarov. — Shu tariqa ezgu maqsad ijobati uchun 1 milliard 360 million soʻm mablagʻ ajratilib, yangi sport maydonchasi va maʼnaviyat maskani barpo etildi.

Aytish joiz, 2024-yili Rishton tumanida maktablarni zamonaviy mezonlar asosida taʼmirlash maqsadida davlat byudjetidan 30 milliard soʻmdan ziyod mablagʻ ajratildi.