Maʼlumki, joriy yilning 21-yanvar kuni, Toshkent shahar hokimi Shavkat Umurzoqov “Toshkent shahrida milliylikni keng targʻib qilishga doir qoʻshimcha chora-tadbirlar toʻgʻrisida”gi qarorni imzolagan edi.

Mazkur qarorga asosan, “Toshshahartransxizmat” Aksiyadorlik jamiyati haftaning har juma kunini “Milliy liboslar kuni” etib belgiladi.

Shu munosabat bilan, 31-yanvar kuni poytaxtimiz aholisi va mehmonlariga, avtobusda harakatlanayotgan yoʻlovchilarga milliy qadriyatlarimizni targʻib qilish maqsadida “Toshshahartransxizmat” AJ tasarrufidagi avtobus saroyi haydovchilari milliy libosda ish boshlashgan.

Jumladan, “8-Avtobus saroyi” filialiga biriktirilgan 67-sonli “Yunusobod mavzesi 19-daha — Xalqaro havo yoʻllari aeroporti-2” va 91-sonli “Yunusobod mavzesi 15-daha ASHB — Koʻkcha masjidi” yoʻnalishlarida harakatlanuvchi avtobus haydovchilari bugungi faoliyatlarini oʻzbek milliy doʻppisini kiygan holda olib borishmoqda.

“Ushbu tadbir orqali milliyligimizni keng targʻib qilish va fuqarolarimizga namuna koʻrsatish maqsad qilingan”, — deyiladi xabarda.

Eslatib oʻtamiz, “Milliy Toshkent” loyihasi doirasida milliy qadriyatlarni targʻib etish boʻyicha ijtimoiy tarmoqlarda kontentlar joylashtirish, ommaviy axborot vositalarida maxsus materiallar tayyorlash vazifalari ham belgilan edi.