Foto: "Xalq so'zi"

Andijon viloyatida yoshlarni ish bilan taʼminlash, ayniqsa,   ijtimoiy himoyaga muhtoj oilalar farzandlarini qoʻllab-quvvatlash maqsadida shu yil boshida ularga 10 sotixdan yer maydoni ajratilgan edi. Natijada “Yoshlar daftari”ga kiritilgan yuzlab yigit-qizlar dehqonchilik qilish orqali daromad manbaiga ega boʻldilar. Misol uchun, Oltinkoʻl tumanida istiqomat qiluvchi Bekzodbek Botirov ana shu imkoniyatdan unumli foydalanish orqali “Yoshlar daftari”dan chiqarildi.

— Yer maydoni ajratilishi bilan kartoshka ekdim, — deydi Bekzodbek. — 3 tonna hosil yigʻib oldim. Uning oʻrniga makkajoʻxori ekdim. Uchinchi ekin oʻrnida mosh  ekdim. Bir paytning oʻzida mosh bilan bir qatorda kungaboqar  parvarishladim. Yaʼni, 10 sotix yerdan 4 turdagi ekin orqali 3-marta hosil yigʻib oldim. Umumiy daromadim 20 million soʻmni tashkil etdi.

Yer bilan tillashishni oʻrgangan yosh yigit qishda ham bekor yurgani yoʻq. Tomorqasidagi 5 sotix maydonda issiqxona tashkil etib, sarimsoqpiyoz ekdi. Bu orqali u qish mavsumining oʻzida yana 20 million soʻm daromad topishni rejalashtirgan.

Chindan ham “Yoshlar daftari”ga kiritilgan  yigit-qizlar bugun dehqonchilik va tadbirkorlik yoʻnalishlarini oʻzlashtirgan holda ehtiyojmandlar safidan chiqmoqdalar. Amalda oʻz natijasini koʻrsatgan ushbu yoʻl orqali 2022-yilda birgina Oltinkoʻl tumanining oʻzida yana 273 nafar shu toifadagi yoshlarga daromad manbaiga ega boʻlishi uchun yaqindan koʻmaklashish koʻzda tutilmoqda.

Saminjon HUSANOV, “Xalq soʻzi”