Foto: Inson huquqlari boʻyicha Oʻzbekiston Respublikasi Milliy markazining matbuot xizmati

Mamlakatimizda “Oʻzbekiston Respublikasi Konstitutsiyasi toʻgʻrisida”gi Konstitutsiyaviy qonun loyihasi Brayl alifbosida chop etildi. Bu ezgu ish Inson huquqlari boʻyicha Oʻzbekiston Respublikasi Milliy markazi va “Barqaror rivojlanish markazi” tomonidan amalga oshirildi. Bu haqda Inson huquqlari boʻyicha Oʻzbekiston Respublikasi Milliy markazining matbuot xizmati xabar xabar bermoqda.

Yangilanayotgan Konstitutsiya matnidagi normalarning yarmidan koʻpi insonning huquq va erkinliklarini himoya qilishning kafolatlarini kuchaytirishga qaratilgan. Jumladan, loyihaning 57-moddasiga muvofiq, mehnatga layoqatsiz va yolgʻiz keksalar, nogironligi boʻlgan shaxslar hamda aholining ijtimoiy jihatdan ehtiyojmand boshqa toifalarining huquqlari davlat himoyasidadir.

Konstitutsiya loyihasining 115-moddasida Vazirlar Mahkamasi aholini, shu jumladan, nogironligi boʻlgan shaxslarni ijtimoiy himoya qilish tizimining samarali faoliyat koʻrsatishini taʼminlashi zarurligi belgilangan.

Shuni ham qayd etish joizki, Milliy markaz tashabbusi bilan 2020-yilda ilk marotaba Oʻzbekiston Respublikasi Konstitutsiyasi va “Nogironligi boʻlgan shaxslarning huquqlari toʻgʻrisida”gi Qonun Brayl alifbosida nashr etilgan edi.

Oʻz navbatida, Konstitutsiyaviy qonun loyihasining Brayl alifbosidagi nashri nogironligi boʻlgan yurtdoshlarimizning huquqlari, erkinliklari va qonuniy manfaatlarini taʼminlashga xizmat qiladi.