Rossiyaning “Utair” aviakompaniyasi parvozlar chastotasini oshirdi va Oʻzbekistonga parvozlarning yangi yoʻnalishini ochdi.

Avvalroq aviatashuvchi Moskva — Samarqand yoʻnalishi boʻyicha haftasiga toʻrt marta: dushanba, seshanba, chorshanba va shanba kunlari yoʻlovchi aviatashuvlarini amalga oshirgan. 2023-yil 16-yanvardan boshlab “Samarqand” aeroporti haftasiga bir marta — dushanba kunlari Samaradan qoʻshimcha muntazam qatnovni yoʻlga qoʻymoqda.

Shuningdek, aviakompaniyaning yangi parvoz yoʻnalishi “Fargʻona” xalqaro aeroportiga boʻladi. Fargʻona — Surgut yoʻnalishi boʻyicha parvoz 2023-yil 22-yanvardan boshlab haftada bir marta — yakshanba kunlari amalga oshirilishi rejalashtirilgan.

Takidlash joiz, “Utair” har haftaning chorshanba kunlari Moskvadan Fargʻonaga parvozlarni amalga oshirishda davom etmoqda.

Eslatib oʻtamiz, “Utair” aviakompaniyasi Oʻzbekistonga 2011-yildan beri yoʻlovchi reyslarini amalga oshirib kelmoqda. Aviakompaniya Samarqand va Fargʻonadan tashqari Toshkent va Buxoro xalqaro aeroportlariga ham muntazam parvozlarni amalga oshiradi.