Namanganda 3 ta yirik institut bitta universitetga birlashtiriladi

11:00 27 Yanvar 2025 Hujjatlar
1255 0

Prezidentning 2025-yil 24-yanvardagi qaroriga koʻra, Namangan muhandislik-texnologiya instituti, Namangan muhandislik-qurilish instituti va Namangan toʻqimachilik sanoati instituti negizida Namangan davlat texnika universiteti tashkil etiladi.

Bu qaror hududda yuqori malakali mutaxassislar tayyorlash, ilmiy tadqiqotlarni rivojlantirish va ishlab chiqarish korxonalari bilan sanoat hamkorligini kuchaytirish maqsadida qabul qilingan.

Yangi universitet muhandislik, qurilish, toʻqimachilik, axborot texnologiyalari, ishlab chiqarish va xizmat koʻrsatish sohalarida oliy maʼlumotli kadrlar tayyorlashga yoʻnaltiriladi. Shuningdek, yuridik shaxs maqomisiz Ilgʻor muhandislik maktabi ham faoliyat yuritib, zamonaviy texnologiyalarni oʻrganish uchun keng imkoniyatlar yaratadi.

2025/2026 oʻquv yilidan ish beruvchi tashkilotlarning real muammolari asosida bitiruv malakaviy ishlari va magistrlik dissertatsiyalari mavzularini belgilash rejalashtirilgan. Bu talabalarning amaliy bilim va koʻnikmalarini yanada oshirishga imkon beradi. Shuningdek, magistratura va bakalavriat yoʻnalishlari xalqaro akkreditatsiyadan oʻtkazilishi nazarda tutilgan.

2025-yildan boshlab yirik ishlab chiqarish korxonalari universitetga sanoat hamkori sifatida biriktiriladi. Bu yosh mutaxassislarning ish jarayoniga yaqindan moslashishiga, ishlab chiqarishning talablari bilan tanishishiga yordam beradi. 2024/2025 oʻquv yilidan boshlab, universitetda taʼlim olayotgan talabalar bitirgach, rasmiy universitet diplomiga ega boʻladi.

Ushbu qaror nafaqat taʼlim tizimini takomillashtirish, balki hududdagi ishlab chiqarish korxonalariga mutaxassislar yetkazib berish orqali iqtisodiy rivojlanishni qoʻllab-quvvatlashga ham qaratilgan. Namangan davlat texnika universiteti kelajakda zamonaviy ilmiy markaz va taʼlim maskani sifatida rivojlanishi kutilmoqda.

Tavsiya etamiz

Izohlar

Hozircha hech kim fikr bildirmagan. Balki Siz birinchilardan bo'larsiz?

Ko‘p o‘qilganlar

Yangiliklar taqvimi

Кластер