Foto: Kon-geologiya vazirligi

Toshkent shahar Uchtepa tumani hokimi lavozimida ishlab kelgan Farhod Ravshanovich Abdullayev boshqa ishga oʻtgani munosabati bilan lavozimidan ozod etildi. Bu haqda Toshkent shahri hokimining 11-iyuldagi farmoyishida maʼlum qilindi.

Togʻ-kon sanoati va geologiya vazirligi matbuot xizmatiga koʻra, Farhod Abdullayev “Oʻzbekiston texnologik metallar kombinati” AJ raisi etib tayinlangan. Uchtepa tumani hokimi vazifasini esa hokimning birinchi oʻrinbosari Jamshid Olimjonov vaqtincha bajarib turadi.

Maʼlumot uchun, Farhod Abdullayev 1978-yilda Toshkent shahrida tugʻilgan. 1999-yilda Toshkent davlat texnika universitetini tamomlagan. Faoliyati davomida qator korxonalar rahbari, xususan, 2011−2017-yillarda Sergeli tumanidagi “Toshkent rangli metall parchalari va rezgi-chiqitlarini tayyorlash va qayta ishlash zavodi” AJ bosh direktori, 2017−2018-yillarda “Oʻzbekiston rangli metall parchalari, chiqindilarini tayyorlash va qayta ishlash zavodi” AJ bosh direktori lavozimida ishlagan. 2019-yildan to hozirgacha Farhod Abdullayev poytaxtning Uchtepa tumani hokimi sifatida ishlab kelayotgandi.

Eslatib oʻtamiz, oldinroq Buxoro shahrining sobiq hokimi Jamol Nosirov Buxoro viloyati Ekologiya, atrof muhitni muhofaza qilish va iqlim oʻzgarishi boshqarmasi boshligʻi etib tayinlangandi.