Foto: Prokuratura departamenti

Toshkent shahri, Samarqand va Jizzax viloyatlarida xorijiy davlatlarga ishga yuborishni vaʼda qilgan shaxslar ushlandi. Bu haqda Bosh prokuratura huzuridagi Iqtisodiy jinoyatlarga qarshi kurashish departamenti xabar berdi.

Qayd etilishicha, departamentning Payariq tumani boʻlimi tomonidan oʻtkazilgan tergovga qadar tekshiruvda fuqarolar S.Sh. (muqaddam sudlangan) va D.E. ushlandi. Ular oʻzaro til biriktirib, fuqaro X.A.ni AQShga ishga yuborishni vaʼda qilgan. Ushbu shaxslar buning uchun 18 000 dollar miqdorida xarajat qilganini aytib, evaziga X.A.ning uy-joyini firibgarlik yoʻli bilan rasmiylashtirib olishga erishgan.

Departamentning Gʻallaorol tumani boʻlimi tomonidan oʻtkazilgan tergovga qadar tekshiruvda muqaddam firibgarlik va boshqa jinoyatlari uchun sudlangan M.I. qoʻlga olingan. Aniqlanishicha, u fuqaro O.P.ning ishonchiga kirib, uni Koreya davlatiga ishga yuborishi evaziga 12 600 dollarni firibgarlik yoʻli bilan qoʻlga kiritgan.

Yashnobod tumanida DXX xodimlari bilan hamkorlikdagi tadbirda M.O. va D.A. ismli fuqarolar qoʻlga tushdi. Xabarga koʻra, ular fuqaro T.B.ni Yaponiyaga ishga yuborishi uchun viza olib berishini aytib, evaziga 2 500 dollarni olgan.

Hozirgi kunda ushbu holatlar yuzasidan Jinoyat kodeksining 168-moddasi (Firibgarlik) bilan jinoyat ishlari qoʻzgʻatilib, tergov harakatlari oʻtkazilmoqda.