Foto: Hasan Paydoyev / "Xalq so'zi"

Toshkent shahrining yangi bogʻida, “TashkentCity” hududida “Yulduzlar muzeyi” mum muzeyi ochildi. Bu joy nafaqat mahalliy aholi, balki ichki va tashqi turistlarning ham sevimli joylaridan biriga aylanishi kutilmoqda. Bu haqda Turizmni rivojlantirish davlat qoʻmitasi xabar berdi.

Maʼlumki, Yevropaga sayohat qiladigan sayyohlarning aksariyati “Madam Tyusso” muzeyiga tashrif buyuradi hamda Gollivud yulduzlari, olimlar, siyosatchilar va boshqa mashhur insonlar haykallari bilan suratga tushib, ular bilan ijtimoiy tarmoqlarda boʻlishishadi.

“Yulduzlar muzeyi”dagi har bir eksponat, uning atrofidagi muhit eng kichik detallarigacha oʻylab ishlangan - jonli qoʻgʻirchoqlar, zamonaviy tarixda oʻchmas iz qoldirgan ulkan shaxslar haykallarining toʻplami va hokazolar. Muzeyda tez orada Oʻzbekistonning taniqli shaxslari haykallari ham namoyon boʻladi va bu barchada katta qiziqish uygʻotishi shubhasiz.

“Shunday ekan, “TashkentCity” hududida joylashgan mum muzeyga tashrif buyuring hamda oʻzingizga manzur boʻlgan taniqli yulduzlarning haykallari bilan suratga tushing!” deb yoziladi xabarda.