Foto: Kun.uz

Sirdaryoda 18 yoshli ikki yigit mashina oʻgʻirlab, huquqni muhofaza qiluvchi organ xodimlariga hujum qildi. Bu haqda Kun.uz xabar berdi.

Maʼlumotlarga koʻra, hodisa 2-avgust kuni sodir boʻlgan. Samarqand shahrida ikki yigit bir avtomashinaga yoʻlovchi sifatida oʻtirgan. Soʻngra Sirdaryo viloyati hududida haydovchi mashinadan tushgan vaqtda, ular avtomobilni oʻgʻirlab qochishgan. Izlarni yoʻqotish maqsadida ular mashina raqamlarini yechib tashlagan.

03:15 da avtomobil oʻgʻirligi haqida xabar tushgan va shundan soʻng ularni qoʻlga olish boʻyicha maxsus operatsiya boshlangan.

Toshkent viloyatining Boʻka tumanida yoʻl harakati qoidalarini buzgan ushbu shaxslarni toʻxtatishga urinayotgan IIB xodimi boʻyni pichoq bilan jarohatlangan. Undan soʻng yigitlar birinchi avtomobilni tashlab ketib, xodimning xizmat avtomashinasi — Matizʼni oʻgʻirlab qochishgan.

Ohangaron shahrida esa YPX xodimining toʻxtash toʻgʻrisidagi talabini inkor etgan holda, uni urib ketishgan.

Shundan soʻng gumonlanuvchilar ushlandi. Ular Jinoyat kodeksining 267-moddasiga koʻra, transport vositasini olib qochish 5-yildan 20-yilgacha ozodlikdan mahrum qilish bilan jazolanadi.