Endi yoʻlovchilar “Silk Avia” mintaqaviy aviakompaniyasining reyslariga chiptalarni “Uzbekistan Airports” yagona aloqa markaziga qoʻngʻiroq qilib xarid qilishlari mumkin.

Aviachipta sotib olish uchun yoʻlovchi +99855 501 22 12 telefon raqami orqali Aloqa markaziga murojaat qilishi va operatorga yoʻnalish, joʻnash sanasi, toʻliq ism-sharifini, aloqa telefon raqami va elektron pochta manzilini aytishi kerak. Chipta broni va Click toʻlov tizimi orqali toʻlash uchun havola elektron pochtaga yuboriladi. Agar Click mobil ilovasi oʻrnatilmagan boʻlsa, toʻlash uchun karta maʼlumotlarini kiritish kerak boʻladi. Aeroportda yoʻlovchi toʻgʻridan-toʻgʻri roʻyxatdan oʻtish joyidagi agentga murojaat qilishi va bortga chiqish talonini olish uchun pasportini koʻrsatishi kerak.

Siz UzCard yoki Humo bank kartalari orqali xizmatlar uchun shu tarzda milliy valyutada toʻlashingiz mumkin. Shuningdek, yoʻlovchilar Silk Avia chiptalarini aviakompaniyaning rasmiy www.silk-avia.com sayti yoki barcha xalqaro aeroportlarning kassalarida naqd va Humo, UzCard, shuningdek Visa, Mastercard va boshqalar orqali xarid qilishi mumkin.

Eslatib oʻtamiz, avvalroq Toshkent aeroportida ANOR va CIP zallarida qolish, shuningdek, Fast Track xizmatlarni yagona aloqa markazi orqali xarid qilish yoʻlga qoʻyilgan edi.