Foto: “Dunyo”

Oʻzbekiston elchisi Farrux Tursunov Ispaniyaning “Milans del Bosch & ITL“ kompaniyasi asoschisi Santyago Milans del Bosh bilan uchrashuv oʻtkazdi. Bu haqda “Dunyo” agentligi xabar berdi.

Maʼlum qilinishicha, muloqot chogʻida ikki davlat oʻrtasidagi madaniy va tarixiy aloqalarni mustahkamlash masalalari muhokama qilingan. Xususan, Samarqand va Madrid shaharlari oʻrtasida doʻstlik aloqalarini oʻrnatish taklifi ilgari surilgan.

Santyago Milans del Bosh Ispaniya va Oʻzbekiston oʻrtasidagi koʻp asrlik diplomatik va madaniy-iqtisodiy munosabatlardan tashqari, ularni ijtimoiy aloqalar ham birlashtirib turishini taʼkidlagan. Shuningdek, u Ikkinchi jahon urushi yillarida Oʻzbekiston Ispaniyadan evakuatsiya qilingan bolalarning bir qismini qabul qilib, ularni urush dahshatlaridan saqlab qolgani uchun minnatdorlik bildirgan.

Ikki mamlakat oʻrtasidagi madaniy va iqtisodiy aloqalarni mustahkamlash, turli sohalarda oʻzaro anglashuv va hamkorlikni rivojlantirish maqsadida Madridda va Toshkentda qoʻshma tadbirlarni tashkil etish yuzasidan fikr almashilgan.

Uchrashuv yakunida elchixonaga Ispaniya elchisi Ruy Gonsales de Klavixoning 1406-yilda Samarqandga qilgan safari haqida yozgan kitobi taqdim qilingan.