Joriy yilning sugʻorish mavsumida Qozogʻiston Oʻzbekiston orqali “Doʻstlik” kanalidan 922 million kubometr suv oladi. Bu haqda Qozogʻiston Suv xoʻjaligi va Irrigatsiya vaziri Nurjan Nurjigitov davlatlararo suv xoʻjaligini muvofiqlashtirish komissiyasining 86-yigʻilishida maʼlum qildi. Uchrashuvda Qozogʻiston, Qirgʻiziston, Tojikiston, Turkmaniston va Oʻzbekiston davlati vakillari qatnashgan.

Shu bilan birga Turkiston viloyatining “Shardara” suv omborida 4,8 milliard kubometr, Qirgʻizistonning “Toʻqtagul” suv omborida 8 milliard kubometr suv toʻplangan boʻlib, ushbu ombor suvlari Qozogʻiston janubidagi yerlarni sugʻorish uchun ishlatiladi.

Yigʻilishda “Norin—Sirdaryo” suv ombori kaskadini joriy yilning 30-sentyabriga qadar ishlatish boʻyicha prognoz jadvali ham tasdiqlandi.

— Hozirgi birinchi vazifamiz toshqin suvini yigʻish. Biz uni Kaspiy dengizi, Balxash, Qamish-Samar koʻllariga, Ulitov viloyatidan Qiziloʻrda viloyati koʻllariga yoʻnaltiramiz. Lekin shu bilan birga janubiy viloyatlarni ham suv bilan taʼminlash muhim ahamiyatga ega boʻlib, bu masalada suv diplomatiyasi juda muhim, — degan Nurjon Nurjigitov.

Qayd etilishicha, “Markaziy Osiyo mamlakatlari oʻrtasida suv-energetika sohasidagi hamkorlik mexanizmini yaratish toʻgʻrisida”gi shartnoma loyihasi ham ishlab chiqilayotgani aytilgan.