Botir MADIYOROV/“Xalq soʻzi”. Yangi yil bayrami tantanalari, qorbobo va qorqiz, ertak qahramonlari ishtirokidagi tadbirlar hammadan ham koʻproq bolajonlar cheksiz quvonch ulashadi.

Fargʻona shahridagi Islom Karimov nomidagi viloyat teatr-konsert saroyida oʻtkazilgan bu yilgi “Prezident archasi” tantanalari ana shunday shukuhi va unutilmas taassurotlarga boy boʻldi. Bayram tadbirida shahar va tumanlardan oilaviy bolalar uyi tarbiyalanuvchilari, ota-ona qarovisiz qolgan oʻgʻil-qizlar hamda Vatanimiz tinchligi va xavfsizligi yoʻlida qurbon boʻlgan harbiy xizmatchilarning farzandlari qatnashdi.

Fargʻona viloyati hokimi oʻrinbosari Sherzodjon Polvonov kelajagimiz vorislarini Yangi – 2025-yil bilan qutlab, ularga Prezident sovgʻalarini topshirdi.

— Bugungi tadbirda viloyatdagi 931 nafar bolalarga “Prezident sovgʻasi” topshirildi, — deydi Ijtimoiy himoya milliy agentligining Fargʻona viloyati boshqarmasi boʻlim mudiri Mirtazoxon Alavitdinov. — Ayni kunlarda ijtimoiy himoyaga muhtoj oilalar, kichkintoylarga shodlik ulashishni maqsad qilgan bayram tadbirlari davom etmoqda.

Tadbir doirasida “Samoviy Yangi yil“ deb nomlangan teatrlashtirilgan badiiy dastur namoyishi barchaga xushkayfiyat ulashdi.