Ботир МАДИЁРОВ/«Халқ сўзи». Янги йил байрами тантаналари, қорбобо ва қорқиз, эртак қаҳрамонлари иштирокидаги тадбирлар ҳаммадан ҳам кўпроқ болажонлар чексиз қувонч улашади.

Фарғона шаҳридаги Ислом Каримов номидаги вилоят театр-концерт саройида ўтказилган бу йилги “Президент арчаси” тантаналари ана шундай шукуҳи ва унутилмас таассуротларга бой бўлди. Байрам тадбирида шаҳар ва туманлардан оилавий болалар уйи тарбияланувчилари, ота-она қаровисиз қолган ўғил-қизлар ҳамда Ватанимиз тинчлиги ва хавфсизлиги йўлида қурбон бўлган ҳарбий хизматчиларнинг фарзандлари қатнашди.

Фарғона вилояти ҳокими ўринбосари Шерзоджон Полвонов келажагимиз ворисларини Янги – 2025 йил билан қутлаб, уларга Президент совғаларини топширди.

— Бугунги тадбирда вилоятдаги 931 нафар болаларга “Президент совғаси” топширилди, — дейди Ижтимоий ҳимоя миллий агентлигининг Фарғона вилояти бошқармаси бўлим мудири Миртазохон Алавитдинов. — Айни кунларда ижтимоий ҳимояга муҳтож оилалар, кичкинтойларга шодлик улашишни мақсад қилган байрам тадбирлари давом этмоқда.

Тадбир доирасида “Самовий Янги йил“ деб номланган театрлаштирилган бадиий дастур намойиши барчага хушкайфият улашди.