Illustrativ foto

Umumtaʼlim muassasalari soni soʻnggi 5 yilda 748 taga oshgan. 2017–2021-yillarda xalq taʼlimi tizimiga 45,3 ming nafardan ortiq erkak oʻqituvchilar qaytarilganligi maʼlum qilindi.

Oʻzbekiston Respublikasi Prezidenti huzuridagi Statistika agentligi maʼlumotlariga koʻra, 2022/2023 oʻquv yili boshiga umumtaʼlim muassasalari soni 10 522 tani tashkil etgan.

Umumtaʼlim muassasalari soni soʻnggi 5 yilda 748 taga oshgan.

Yillar kesimida umumtaʼlim muassasalari soni:

— 2018/2019 oʻquv yili boshiga – 9774 ta

— 2019/2020 oʻquv yili boshiga – 10090 ta

— 2020/2021 oʻquv yili boshiga – 10181 ta

— 2021/2022 oʻquv yili boshiga – 10289 ta

— 2022/2023 oʻquv yili boshiga – 10522 ta

Umumtaʼlim muassasalari soni 1991/1992 oʻquv yili boshiga nisbatan 1965 taga oshgan.

Shuningdek, “Taraqqiyot strategiyasi” markazining 2022-yil sarhisobiga koʻra, umumtaʼlim maktablari soni 2017-yilgi 9 718 tadan, 2021-yilda 10 289 taga koʻpaydi. Jumladan, 135 ta nodavlat umumtaʼlim maktablari, 14 ta Prezident maktablari faoliyati yoʻlga qoʻyildi. Natijada, maktablardagi oʻquvchilar soni 5 271,3 ming nafardan 6 304,6 ming nafarga yetdi.

Keng jamoatchilik va ota-onalarning fikr-takliflari asosida mamlakatda 11 yillik majburiy maktab taʼlimi qayta joriy etildi. Shuningdek, xorijiy ekspertlar ishtirokida boshlangʻich sinflar uchun 170 nomdagi yangi avlod darsliklari yaratildi.

2020-2025-yillarda xalq taʼlimi tizimida inklyuziv taʼlimni rivojlantirish konsepsiyasi qabul qilindi.

Bundan tashqari, umumtaʼlim maktablaridagi oʻqituvchilarning maoshi 2017-yilgi 1 214,1 ming soʻmdan, 2021-yilda 2 340,3 ming soʻmga oshirildi. Maktablarning kompyuter sinflari bilan taʼminlanganlik darajasi esa, 95,2 foizdan 99,1 foizga yetkazilgan.

Maʼlumot uchun, “Taraqqiyot strategiyasi” markazining  hisoboti koʻra, 2021-yilda maktablar soni 10 289 tani tashkil etayotgan boʻlsa, Statistika agentligi maʼlumotlariga koʻra, 2022/2023 oʻquv yili boshiga 10 522 ta umumtaʼlim muassasalari toʻgri kelmoqda. Demak, Oʻzbekistondagi maktablar soni soʻngi ikki yilda 233 taga koʻpaygan.