Foto: “Dunyo”

Oʻzbekistonning Favqulodda va Muxtor elchisi Nodirjon Turgʻunov Saudiya Arabistoni Valiahdi, Bosh vaziri Muhammad bin Salmon bin Abdulaziz Ol Saudga ishonch yorliqlarini topshirdi. Bu haqda “Dunyo” axborot agentligi xabar berdi.

Maʼlum qilinishicha, kecha, 30-sentyabr kuni Saudiya Arabistoni Valiahdi Podshoh Salmon bin Abdulaziz Ol Saud nomidan 37 ta xorijiy davlatning 2023-2024-yillarga tayinlangan elchilarining ishonch yorliqlarini qabul qilib olgan.

Ar-Riyoz shahridagi Al-Yamama saroyida oʻtgan marosimdan keyin boʻlgan muloqotda Saudiya Arabistoni Valiahdi Muhammad bin Salmon Oʻzbekiston Prezidentiga mamlakat Podshohi hamda oʻzining samimiy tilaklari va iliq salomlarini yoʻllagan.

Maʼlumot uchun, Oʻzbekiston va Saudiya Arabistoni oʻrtasidagi diplomatik munosabatlar 1992-yil 20-fevralda oʻrnatilgan.

Eslatib oʻtamiz, Nodirjon Turgʻunov 2024-yil mart oyida Oʻzbekistonning Saudiya Arabistonidagi elchisi sifatida Ar-Riyoz shahriga kelgan edi. Shuningdek, u 2024-yil noyabr oyida Oʻzbekistonning Islom hamkorlik tashkilotidagi doimiy vakili sifatida akkreditatsiyadan oʻtgan. 2025-yil aprel oyida esa u bir vaqtning oʻzida mamlakatimizning birinchi elchisi sifatida Bahrayn Tashqi ishlar vazirligiga ishonch yorliqlari nusxalarini topshirgan edi. Shuningdek, u 2-iyun kuni Iordaniyadagi elchi sifatida ushbu mamlakat Podshohi Abdulloh II bin al-Husaynga ishonch yorliqlarini taqdim qildi.