Bosh prokuratura huzuridagi Departamentning Xatirchi tuman boʻlimi tomonidan DXX va IIB xodimlari bilan hamkorlikda oʻtkazilgan tezkor tadbirda “P.N.» fermer xoʻjaligi rahbari N.P. xoʻjalikning 1,4 gektar sugʻoriladigan yer maydonini fuqaro Sh.Sh.ga goʻyoki tuman qishloq xoʻjaligi boʻlimida ishlovchi tanishlari orqali uning nomiga rasmiylashtirib berish evaziga 200 mln soʻmni olgan vaqtida ashyoviy dalillar bilan ushlangan.

Shu kabi, Departamentning Guliston tuman boʻlimi tomonidan DXX va IIB xodimlari bilan hamkorlikda oʻtkazilgan tezkor tadbirda fuqaro T.E. oʻziga sabzavotchilik yoʻnalishida fermer xoʻjaligi tashkil etish uchun ajratilgan 5,8 gektar sugʻoriladigan yer maydonini fuqaro B.D.ga 16 500 AQSH dollariga sotishga kelishib, tanishlari yordamida rasmiylashtirib berishni vaʼda qilib, oldindan 9 900 AQSH dollari va 1,15  mln soʻmni olgan vaqtida ashyoviy dalillar bilan ushlangan.

Mazkur holatlar yuzasidan Jinoyat kodeksining 229-6-moddasi (sugʻoriladigan yer uchastkasiga yoki uning bir qismiga boʻlgan huquqni sotish yoxud qonunga xilof ravishda boshqacha tarzda oʻzga shaxsga berish) va 28, 211-moddasi (pora berish) bilan jinoyat ishlari qoʻzgʻatilib, tergov harakatlari oʻtkazilmoqda.