Xalqaro ishlab chiqarish zanjirlariga kirmasak, iqtisodiy oʻsish biz kutgandek boʻlmaydi – Shavkat Mirziyoyev
![](https://xs.uz/upload/post/2024/08/20/58c6e8e749eeadc2fcfb4b2e39cbf79f0820.jpg)
Foto: Prezident matbuot xizmati
Prezident mahalliy korxonalarni tashqi bozorga chiqishini qoʻllab-quvvatlash izchil davom ettirilishini taʼkidladi. Bu haqda Prezident matbuot kotibi Sherzod Asadov xabar berdi.
Mamlakatning yetti oylik eksporti 13 foizga oʻsib, 10 milliard dollardan oshdi, avval eksport qilmagan 1 ming 610 ta korxona tashqi bozorlarga chiqdi. Hozirda Jahon savdo tashkilotiga 2026-yilda aʼzo boʻlish boʻyicha katta qadamlar qoʻyilmoqda.
Prezident yon qoʻshnilarimizning yillik importi 90 milliard dollar boʻlgani bilan bizning undagi ulushimiz atigi 4 foiz ekani, yoki MDH doirasida erkin savdo rejimi oʻrnatilgani bilan, Hamdoʻstlikdagi 500 milliard dollarlik importda bizning hissamiz 2 foizga ham bormasligini misol qilib keltirdi.
Demak, raqobat borasida hali ancha ishlashimiz zarurligi koʻrsatib oʻtildi.
Bu borada katta islohot boshlanib, ikki oy oldin alohida farmon bilan metallurgiya, kimyo, energetika va telekommunikatsiya tarmogʻida eksklyuziv huquqlar bekor qilindi.
Korporativ xaridlarda ishlab chiqarish uchun olinadigan mahsulotlarga ham narx ustuvorligi bekor qilinishi qayd etildi.
Bundan buyon, hech kimda alohida huquq boʻlmasligi, xoh davlat strategik korxonasi boʻlsin, xoh xususiy korxona yoki xorijiy investor boʻlsin, iqtisodiyotda barcha teng sharoitda ishlashi taʼkidlandi.
Prezident Jahon savdo tashkilotiga aʼzolik xalqaro tranzit yuk tashishda ortiqcha toʻlov yoki cheklovlardan xalos qilishini qayd etdi. Albatta, bu – raqobatdosh boʻlishimizga yana bir turtki beradi.
Umuman, mahsulot va xizmatlar sifatini oshirish, tashqi bozorlarda munosib oʻrin topish uchun xalqaro standartlarga oʻtish kerakligi taʼkidlandi.
Masalan, pestitsidlar nazorati yoʻlga qoʻyilmas ekan, qishloq xoʻjaligi mahsulotlari eksportini 2030-yilgacha 10 milliard dollarga yetkazish boʻyicha belgilagan marralarga erishib boʻlmaydi. Yetishtirayotgan mahsulotlarimiz bozorini topolmasdan nobud boʻlaveradi.
Shu bois, bu yil oziq-ovqat mahsulotlari xavfsizligi boʻyicha katta oʻzgarishlar rejalashtirilgan. Bu orqali karantin, veterinariya, sanepidemnazorat va standart tashkilotlarining takrorlovchi vakolatlari qisqaradi, tadbirkorlarni qayta-qayta tekshirishga chek qoʻyiladi.
Oʻtgan yilgi uchrashuvdan keyin 309 ta korxonaga 280 million dollar eksportoldi kreditlari ajratildi. Ushbu korxonalar hozirgacha 625 million dollarlik eksport qildi. Bu raqam yil yakunigacha yana ikki karra oshishi hisob-kitob qilingan.
Ochiq muloqotga tayyorgarlik doirasida yana 122 ta eksportchining 145 million dollarlik aylanma mablagʻga ehtiyoji borligi aniqlandi.
Shu bois, tarmoqlarni rivojlantirishga berilgan mablagʻdan 200 million dollari eksportoldi moliyalash uchun yoʻnaltiriladi.
Shundan, 50 million dollari bank kreditlari uchun kafillikka beriladi.
Bu mablagʻlar hisobidan bir yil ichida qoʻshimcha 1 milliard dollar eksport boʻladi.
Tavsiya etamiz
Ko‘p o‘qilganlar
- Dam olish kunlari harorat +27 darajagacha pasayadi
- “Barselona”ga kelgan Dani Olmo klubni qiyin ahvolga solib qoʻydi
- Bir oylik harbiy xizmat toʻlovi miqdori oshiriladi
- Mbappe “Real” uchun gol urgan oʻyinda UYEFA Superkubogiga ega chiqdi
- “Andijon” klubi futbolchisi Milliy gvardiya xodimini urib, jarohat yetkazdi
- YHXB: Tartibga solinmagan oʻtish joyidan oʻtayotgan piyodalardan qoʻllarini baland koʻtarishni soʻraymiz
Izohlar
Hozircha hech kim fikr bildirmagan. Balki Siz birinchilardan bo'larsiz?
Izoh qoldirish uchun tizimga kiring