Isroilning Gʻazo janubidagi Xon-Yunis shahriga uyushtirgan havo hujumi oqibatida HAMASning siyosiy yetakchilaridan biri Saloh al-Bardavil halok boʻldi. Bu haqida “BBC” nashri xabar berdi.

Mahalliy aholi vakillarining soʻzlariga koʻra, Isroil tomonidan uyushtirilgan havo hujumi natijasida HAMASning eng yuqori martabali siyosiy yetakchisi hisoblangan Al-Bardavil hamda uning rafiqasi halok boʻlgan. Hozircha mazkur hujum oqibatlari haqida Isroil rasmiylari hech qanday izoh bermagan.

Maʼlum boʻlishicha, Al-Bardavil mamlakatdagi taniqli shaxslardan biri hisoblanib, u doimiy ravishda mahalliy ommaviy axborot vositalarida koʻrinish berib turgan.

Soʻnggi maʼlumotlarga koʻra, Bardavil hamda uning rafiqasi namoz oʻqiyotgan chogʻda ularning chodiriga Isroil raketasi kelib tushgan. Mazkur hujumlar oqibatida Xon-Yunis hududida 18 nafar, 24 soat ichida esa mamlakatning boshqa hududlarida 32 nafar falastinlik halok boʻlgan.

Maʼlumot uchun, deyarli ikki oy davom etgan oʻt ochishni toʻxtatish kelishuvining birinchi bosqichi yakunlangach, Isroil hukumati hafta boshidayoq Gʻazo sektoriga kuchli zarbalar berishni qayta boshlagan edi.