Foto: Халқ сўзи

Ajiniyoz nomidagi Nukus davlat pedagogika institutida talaba-yoshlarning boʻsh vaqtlarini mazmunli oʻtkazishi uchun koʻmaklashish maqsadida sport musobaqalari va intellektual tanlovlar tashkil etish yaxshi anʼanaga aylangan. Ana shunday tanlovlarda hamda fan olimpiadalarida gʻoliblikni qoʻlga kiritgan faol, iqtidorli talabalar Navroʻz bayrami oldidan kompyuter jamlanmasi, noutbuk, planshet, mobil telefon kabi qimmatbaho sovgʻalar bilan taqdirlandi.

—Tinch yurtga bayramlar yarashadi, albatta, — deydi Nukus davlat pedagogika instituti rektori Bayrambay Otemuratov. — Mana shunday qutlugʻ kunlarda oʻzlarining bilim va salohiyati, isteʼdodi bilan tengdoshlariga ibrat boʻlayotgan talabalarni ragʻbatlantirishni lozim topdik. Shu oʻrinda yana bir jihatga toʻxtalib oʻtsam. Maʼlumki, Prezidentimiz tomonidan ilgari surilgan Besh tashabbus doirasida muayyan chora-tadbirlar rejasini ishlab chiqqanmiz. Unga koʻra musiqa, tasviriy sanʼat, adabiyot, teatr hamda sanʼatning boshqa turlariga talabalarning qiziqishlarini oshirish, sogʻlom turmush tarzini shakllantirish, zamonaviy IT boʻyicha koʻnikmalarini mustahkamlash, kitobxonlikni keng targʻib qilish yoʻnalishlarida tanlovlar doimiy tashkillashtirib kelinmoqda. Bugungi tadbir mana shunday tanlovlarning amaliy ahamiyatini yanada oshirishi, talabalarni yanada faollikka, oʻz ustida izlanishga undashi shubhasiz.

Gʻ.Otajonov, “Xalq soʻzi”.