YUNESKOning Oʻzbekistondagi vakolatxonasi va Oʻzbekiston zamonaviy jurnalistikasini rivojlantirish markazi tomonidan Jizzax viloyatida faoliyat yuritayotgan ommaviy axborot vositalari xodimlari uchun “Data-jurnalistika” mavzusida 3 kunlik seminar-trening oʻtkazildi.

“Oʻzbekiston ommaviy axborot vositalarining jamoatchilik manfaatlariga xizmat qilish imkoniyatlarini oshirish” nomli mazkur loyiha Buyuk Britaniya davlati tomonidan moliyalashtirilgan.

— Yangi loyihaning asosiy maqsadi axborotlashgan jamiyatning rivojlanib borishi natijasida yurtimiz jurnalistlarining xolis va keng qamrovli media kontentini yaratish, ularning mahorat va koʻnikmalarini oshirishdan iborat, — deydi loyiha treneri Xotam Abduraimov. — Dunyoda internet tarmogʻi rivojlanib borar ekan unga xos “Data-jurnalistika” sohasi ham rivojlanib bormoqda. Endi jurnalistlar axborot makonidan va dasturiy taʼminotdan oʻzlarini qiziqtirgan sohalari boʻyicha maʼlumotlarni olishi va undan foydalanishi mumkin.

Seminar-treningda ishtirokchilar “Data-jurnalistikaga kirish”, “Maʼlumotlarni yigʻish”, “Saralash va tahlil qilish”, “ Gipoteza yaratish” mavzulari boʻyicha mashgʻulotlarda ishtirok etishdi. Shuningdek, bugungi kundagi dolzarb masalalar va qiziqarli mavzularda kontent yaratish boʻyicha amaliy mashgʻulotlar oʻtishdi.

Tolibjon ERGASHEV

“Xalq soʻzi”