Fransiya poytaxtida oʻtkazilayotgan yozgi Olimpiada oʻyinlarida oʻzbek sportchilari oʻz yurishlarini davom ettirmoqda.

Olimpiada oʻyinlarining 14-kunida Oʻzbekistonning 13 nafar atleti sportning 5 turi: boks, kurash, badiiy gimnastika, taekvondo va suvga sakrash boʻyicha chiqish qiladi. Ikki bokschi oltin medal uchun ringga chiqsa, ikki kurashchi bronza medali uchun bahsga kirishadi.

Igor Myalin 13:10 dan boshlab erkaklar oʻrtasida 10 metrdan suvga sakrash dasturida debyut qiladi. U mazkur yoʻnalishda Oʻzbekiston tarixida birinchi litsenziyaga egalik qilgandi.

Soat 13:00 dan keyin badiiy gimnastikachilar guruh mashqini bajarishga kirishadi. Tarkibda Evelina Atalyants, Shaxzoda Ibragimova, Mumtozabonu Isʼhoqzoda, Amaliya Mamedova, Irodaxon Sadikova kabi tajribali sportchilarimiz mavjud.

Soat 13:10 dan boshlab 22 yoshli Osiyo chempioni Jasurbek Jaysunov -80 kg vazn toifasida saralash bahslarida eronlik Mehran Barkhordariga qarshi dayanga chiqadi. Soat 15:00 dan soʻng Osiyo oʻyinlari sovrindori Ozoda Sobirjonova serbiyalik Aleksandra Perishichga qarshi jang qiladi.

Soat 14:00 dan soʻng erkin kurashchi Razambek Jamalov -74 kg vazn toifasida saralash bosqichida qochoqlar jamoasidan 26 yoshli rossiyalik Mahamedhabib Kadzimahamedauga qarshi gilamga chiqadi. Javrail Shapiyev esa oʻtish bosqichida Kanada vakili Robert Murga qarshi kurashadi. Soat 21:15 dan soʻng yana bir kurashchi (-57 kg) Gʻulomjon Abdullayev bronza medali uchun gilamga chiqadi. U Puerto Riko va Hindiston vakillari bahsining gʻolibi bilan kurashadi.

10-avgustga oʻtar kechasi oʻzbekistonliklarni 2 ta final jangi kutmoqda. Soat 00:30 dan keyin (-71 kg) bokschi Asadxoʻja Moʻydinxoʻjayev Meksika vakili Marko Alvarezga qarshi jang qiladi. Soat 01:35 dan soʻng esa (-92 kg) Lazizbek Mullojonov ozarbayjonlik Loren Dominguyez bilan kuch sinashadi.

“Xalq soʻzi” barcha sportchilarimizga omad tilaydi.

Avvalroq, Ulugʻbek Rashitov va Hasanboy Doʻsmatovlar ikki karradan Olimpiada oltin medal sohiblari boʻlgan edi.