Фото: ДХХ

Жиззах вилоятида «Ҳудудгаз» газ таъминоти филиали ходими 6 минг доллар пора олган вақтида қўлга тушди. Бу ҳақда Давлат хавфсизлик хизмати хабар берди.

Қайд этилишича, «Ҳудудгаз Жиззах» ГТФ етакчи мутахассиси Жиззах шаҳрида фаолият юритувчи МЧЖда ўтказилган текширувда носоз газ ҳисоблаш ускунасидан фойдаланилганини аниқлаб, бу бўйича тегишли далолатнома тузган.

Бироқ у ўз хизмат мавқеини суиистеъмол қилиб, тузилган далолатномани бекор қилиш ҳамда Иқтисодий жиноятларга қарши курашиш департаментининг Жиззах шаҳар бўлими томонидан олиб борилаётган терговга қадар текширув бўйича жиноят иши қўзғатмаслик масаласини ҳал қилиб бериш эвазига МЧЖ вакилидан 6 минг АҚШ доллари талаб қилган.

ДХХ ходимлари томонидан ўтказилган тезкор тадбирда, ушбу «етакчи мутахассис» сўралган пул маблағини «Ҳудудгаз Жиззах» ГТФ биноси олдида олган вақтида ашёвий далиллар билан ушланган.

Ўтказилган лаборатория текшируви натижасига кўра, газ ҳисоблагич ташқи таъсир кўрсатилмаган ҳолда носоз ҳолатга келган.

Маълум қилинишича, ҳозирда мазкур шахсга нисбатан Жиноят кодексининг 25,168-моддаси 3-қисми «в» банди ва 28,211-моддаси 1-қисми билан жиноят иши қўзғатилган.

Шунингдек, дастлабки тергов ҳаракатлари доирасида ГТФ етакчи мутахассисининг ИЖҚКД Жиззах шаҳар бўлимидаги «таниши»нинг шахсига ҳам аниқлик киритилиб, ҳозирда унга нисбатан хизмат текшируви тайинланган.