Ургут азалдан кўҳна карвон йўлининг дилбар маскани, меҳнаткаш одамлари, деҳқончилиги, савдоси ва ҳунармандчилиги билан шуҳрат топган диёр. Ана шу тарихий ва меҳнатсевар заминга илк бор йўловчи поезди кириши ургутликлар хотирасида узоқ йиллар муҳрланиб қоладиган воқеага айланди. Чунки айнан шу куни туман аҳлининг азалий орзуси — тоғ бағрига пўлат изларда поезд кириб келиш орзуси рўёбга чиқди.

Маълумки, ҳудудда транспорт инфратузилмасини яхшилаш, йўловчи ва юк ташиш имкониятларини кенгайтириш вақт талаби эди. Шу мақсадда Давлатимиз раҳбари Шавкат Мирзиёевнинг ташаббуси билан “Ўзбекистон темир йўллари” акциядорлик жамияти мутахассислари Самарқанд – Ургут йўналиши бўйлаб 55,4 километрлик янги темир йўл тармоғини қисқа муддатда қуриб битказдилар. Президентимизнинг Самарқанд вилоятига ташрифи чоғида мазкур йўналиш расмий очилди. Давлат раҳбари вилоят фаоллари билан бирга Самарқанддан Ургутга илк бор поездда бориб, туман тарихида янги саҳифа очди.

“Ургут” вокзали янги йўналишнинг асосий боғловчи нуқталаридан бири сифатида аҳамиятли. Вокзал инфратузилмаси, йўловчиларга хизмат кўрсатиш тизими ва ҳаракатни тўғри ташкил этиш замонавий талабларга мос равишда яратилган. Туристлар ва маҳаллий аҳоли учун қулайликлар эътибор марказида, йўловчилар учун барча зарур шароитлар мавжуд. Самарқанддан Ургутга ва Ургутдан Самарқандга йўловчи поездлари кунига икки марта қатнайди. Чипталар вокзалларда ҳам, онлайн тарзда ҳам харид қилинади.

- Ниҳоят, поезд келди! Бу йўл ургутликлар учун узоқ кутилган имкониятларни очади, — дейди Нуроний жамғармаси Ургут туман бўлими раиси Фармон Азизов. — Тўғрисини айтиш керак, 55 километрдан ортиқ темирйўл тармоғи, иккита замонавий вокзал ҳамда бошқа кўплаб инфратузилма объектларини шунча қисқа фурсатда қуриб битказилишига айримлар ишонмаган эди. Лекин Президентимиз айтганларидек, мана қилса бўлар экан. Бу билан туманимизда йўловчи ва юк ташишнинг янги имконияти пайдо бўлди. Президентимиз ташриф давомида Ургутни янада ривожлантириш бўйича кўплаб янги ташаббусларни айтди. Биз нуронийлар ҳам бу ишларни амалга оширишга ўз тажрибамиз билан ҳисса қўшамиз.

Ургут — Самарқанд вилоятининг энг йирик туманларидан бири. Бугунги кунда бу ерда тахминан 600 минг аҳоли истиқомат қилади. Шу кунга қадар Ургутни Самарқанд шаҳри билан фақат автомобиль ва автобус йўналишлари боғлаб турган. Янги участка “Тоштемирйўллойиҳа” МЧЖ томонидан ишлаб чиқилган бош режа асосида қурилди. Замонавий муҳандислик ечимлари ва стандартлар ҳисобга олинган ҳолда барпо этилган ушбу темир йўл Жомбой туманидаги “MAN” заводи яқинидан бошланиб, 4Р-238 автомобиль йўлини кесиб ўтади. “Зарафшон” дарёси бўйлаб Ургут туманига боғланади. “Зарафшон” дарёси бўйидан ўтганда сўнгги 9 ойдаги темирйўлчилар ва қурувчилар меҳнатининг самараси сезилади. Икки вокзал ҳам замонавий ва қулай.

- Буюртмачи “Ўзбекистон темир йўллари” акциядорлик жамияти бўлиб, лойиҳага кўра 55,4 километрлик “Самарқанд — Ургут” участкасида 1 минг 955 куб метр тупроқ кўтарма ишлари бажарилди, — дейди Ургут вокзали бошлиғи Бекзод Мамарасулов. — Жами 101 дона металл сув ўтказиш қувури ўрнатилди. 58,3 километрлик темир йўл излари ётқизилди. “Жартепа” ва “Ургут” вокзаллари бинолари ҳам тўлиқ тайёр. “Зарафшон” дарёси бўйидаги дамба барпо этилди. “Жартепа” станциясида юк тушириш, ортиш шохобча темир йўлига 833 метр из ётқизилди. Ҳозирда қурилиш-монтаж ишлари давом этмоқда. Йўналиш Самарқанд, Жомбой, Пастдарғом, Тойлоқ ва Ургут аҳолиси учун хавфсиз ва замонавий транспорт хизматини тақдим этади, ички туризм ривожига ҳам катта туртки беради.

- Президентимиз ташрифидан сўнг вокзал атрофида аҳоли фаровонлиги ва ҳудуднинг иқтисодий жозибадорлигини оширишга қаратилган қўшимча лойиҳалар устида ишлаяпмиз, — дейди “Ургут” вокзалини барпо этган тадбиркор Анвар Темуров. — Вокзалга яқин ҳудудларда автовокзал, миллий усулдаги чойхона, экобозор, кўп қаватли турар жой бинолари, хусусий мактаб ва болалар боғчалари қуриш режалаштирилмоқда.

Темир йўл инфратузилмаси иқтисодиётнинг асосий тармоқларидан бири бўлиб, ушбу лойиҳа “Ургут” эркин иқтисодий зонаси салоҳиятини оширишга хизмат қилади. Янги йўналиш ишга тушиши натижасида 130 та янги иш ўрни яратилади. Ургутда логистик тўсиқлар бартараф этилиб, юк ташиш тезлашади. Маҳсулотлар бозорларга арзон ва вақтида етказилади. Инвесторлар учун қулайликлар ортиб, ҳудуднинг рақобатбардошлиги ошади.

- Аҳолини Самарқанд билан боғлаш билан бирга, бу ерда ишлаб чиқилаётган маҳсулотларни ҳам юк поезди орқали етказишга катта эҳтиёж сезиларди, — дейди меҳнат фахрийси Ҳамроқул Рофиев. — Ургут қўшни Тожикистон билан чегарадош, савдо-сотиқ кўлами йилдан-йилга ортиб бормоқда. Бир кунда “Жартепа” божхона постидан 4 мингга яқин аҳоли ўтиб қайтади. Поездда Самарқандга келиш анча қулай ва хавфсиз. Бу йўналиш Панжакент ва Душанбега келувчилар учун ҳам қулайлик яратади.

Йўловчи поезди қатнови йўлга қўйилиши муносабати билан ташкил этилган пресс-тур давомида журналистлар ва жамоатчилик янги темирйўл тармоғи ҳамда Жартепа ва Ургут вокзалларидаги шароитлар билан яқиндан танишди.

Абдулазиз ЙЎЛДОШЕВ, “Халқ сўзи”.