Жанубий Корея прокуратураси ҳокимиятдан четлатилган Юн Сок Ёлни исён қилишда айблади. Бу ҳақда «Yonhap news» агентлиги хабар берди.

Маълумотларга кўра, у Жанубий Кореянинг собиқ мудофаа вазири Ким Ён Хён билан тил бириктириб, уруш, қуролли можаро ёки шунга ўхшаш миллий инқироз белгилари бўлмаган вазиятда ҳарбий ҳолат эълон қилган ва 3 декабрдаги намойишларга сабабчи бўлган.

Прокурорлар Юн Сок Ёл депутатларнинг у эълон қилган ҳарбий ҳолатга қарши овоз беришларига йўл қўймаслик учун парламентга ҳарбий кучлар юборганини ҳам даъво қилмоқда.

Терговчилар президентни январь ойи ўрталарида ҳибсга олган эди. Унинг ўзи ҳибсга олинганидан кейин эълон қилинган видеомурожаатида қон тўкилмаслиги учун сўроққа келишга қарор қилганини билдирди.

Агентликнинг аниқлик киритишича, ҳибсда сақлаш муддати тугашига бир кун қолганида президентга расман айблов эълон қилинди. Коррупция бўйича тергов бошқармаси президентга қарши айбловлар қўйиш учун қонуний ваколатга эга эмаслиги важидан ўтган ҳафта ишни прокуратурага топширганди.

Энди Юн Сок Ёлнинг ҳибсдаги муддати тугашига икки кун қолганида, прокурорлар унинг айбини судда исботлашлари керак.

Таъкидлаш жоиз, президент 2024 йил 3 декабрдан 4 декабрга ўтар кечаси «Шимолий Кореяга хайрихоҳ кучларни йўқ қилиш ва конституциявий тузумни ҳимоя қилиш учун» Жанубий Кореяда ҳарбий ҳолат эълон қилган эди. Шу куни парламент қарорни бекор қилиш учун овоз берди ва бир неча соат ичида ҳарбий ҳолат бекор қилинди.