Жанубий Корея ҳарбий-ҳаво кучларининг қирувчи самолёти адашиб ўқув полигонидан ташқарида жойлашган Пхочхон шаҳрига саккизта бомба ташлаб юборди. Бу ҳақида «Yonhap News» агентлиги хабар берди.

Маълум қилинишича, ҳолат КФ-16 русумли қирувчи самолёти билан содир бўлган. Ўтказилаётган ўқув-машғулот жараёнидаги эҳтиётсизлик оқибатида ҳарбий учувчи МК-82 ҳаво бомбаларини аҳоли яшаш ҳудудига ташлаб юборган.

Янглиш ташлаб юборилган бомбалар сабаб бир нечта уй ва черков жиддий зарар кўрган ҳамда 15 киши жароҳатланган. Шулардан етти нафарининг аҳволи оғир. Жанубий Корея ҳарбий-ҳаво кучлари мазкур ҳолат юзасидан жамоатчиликдан узр сўраган.

«МК-82 ҳаво бомбаларининг тасодифан ташлаб юборилиши оқибатида тинч аҳоли жабрланганидан жуда афсусдамиз. Жароҳатланганларнинг тезроқ соғайиб кетишини тилаб қоламиз. Мазкур ҳолат юзасидан тергов ҳаракатлари бошлаб юборилди», дейилади Жанубий Корея Ҳарбий-ҳаво кучлари баёнотида.

Жанубий кореялик ҳарбий хизматчиларнинг таъкидлашича, мазкур ҳодиса Пхочхон шаҳридаги Синчжин полигони ҳудудида ҳарбий-ҳаво кучлари, қуруқликдаги қўшинлар ҳамда Жанубий Кореяда жойлашган АҚШ қўшинлари иштирокида ҳарбий машғулотлар ўтказилаётган чоғда содир бўлган бўлиши мумкин.