Janubiy Koreya harbiy-havo kuchlarining qiruvchi samolyoti adashib oʻquv poligonidan tashqarida joylashgan Pxochxon shahriga sakkizta bomba tashlab yubordi. Bu haqida “Yonhap News” agentligi xabar berdi.

Maʼlum qilinishicha, holat KF-16 rusumli qiruvchi samolyoti bilan sodir boʻlgan. Oʻtkazilayotgan oʻquv-mashgʻulot jarayonidagi ehtiyotsizlik oqibatida harbiy uchuvchi MK-82 havo bombalarini aholi yashash hududiga tashlab yuborgan.

Yanglish tashlab yuborilgan bombalar sabab bir nechta uy va cherkov jiddiy zarar koʻrgan hamda 15 kishi jarohatlangan. Shulardan yetti nafarining ahvoli ogʻir. Janubiy Koreya harbiy-havo kuchlari mazkur holat yuzasidan jamoatchilikdan uzr soʻragan.

“MK-82 havo bombalarining tasodifan tashlab yuborilishi oqibatida tinch aholi jabrlanganidan juda afsusdamiz. Jarohatlanganlarning tezroq sogʻayib ketishini tilab qolamiz. Mazkur holat yuzasidan tergov harakatlari boshlab yuborildi”, deyiladi Janubiy Koreya Harbiy-havo kuchlari bayonotida.

Janubiy koreyalik harbiy xizmatchilarning taʼkidlashicha, mazkur hodisa Pxochxon shahridagi Sinchjin poligoni hududida harbiy-havo kuchlari, quruqlikdagi qoʻshinlar hamda Janubiy Koreyada joylashgan AQSH qoʻshinlari ishtirokida harbiy mashgʻulotlar oʻtkazilayotgan chogʻda sodir boʻlgan boʻlishi mumkin.