Саминжон ҲУСАНОВ/«Халқ сўзи». Жалақудуқ туманида Оила ва хотин-қизлар маскани фойдаланишга топширилди. Бу ердаги мавжуд шароит опа-сингилларимизни ижтимоий ҳимоя қилиш, моддий ва маънавий қўллаб-қувватлаш, бандлиги таъминлаш, доимий даромад манбаига эга қилиш, мавжуд муаммоларининг ижобий ечимини таъминлаш ишларини янги босқичга кўтаришга хизмат қилади.

— Давлатимиз раҳбари Андижон вилоятига ташрифи давомида туманда ушбу масканни барпо этиш орқали хотин-қизларнинг жамиятдаги фаоллигини ошириш муҳимлиги юзасидан кўрсатма берган эди, — дейди Ўзбекистон Республикаси Оила ва хотин-қизлар қўмитаси бўлим бошлиғи Мавлудахон Низомова. — Кўрсатма ижроси сифатида қад ростлаган бу бино туман хотин-қизларининг энг ишончли масканига айланади. Бу ерда опа-сингилларимизнинг ҳам ҳаётда, ҳам жамиятда муносиб ўрин эгаллашлари учун барча қулайликлар яратилган. Жумладан, турли йўналишлар бўйича ўқув курслари, ҳуқуқий ва психологик маслаҳатхона, касб-ҳунарга ўргатиш марказлари фаолият юритмоқда. «Ёш оналар мактаби», «Оила кутубхонаси», «Она ва бола» хоналари, спорт ва фитнес машғулотлари ҳам ташкил этилган.