Saminjon HUSANOV/“Xalq soʻzi”. Jalaquduq tumanida Oila va xotin-qizlar maskani foydalanishga topshirildi. Bu yerdagi mavjud sharoit opa-singillarimizni ijtimoiy himoya qilish, moddiy va maʼnaviy qoʻllab-quvvatlash, bandligi taʼminlash, doimiy daromad manbaiga ega qilish, mavjud muammolarining ijobiy yechimini taʼminlash ishlarini yangi bosqichga koʻtarishga xizmat qiladi.

— Davlatimiz rahbari Andijon viloyatiga tashrifi davomida tumanda ushbu maskanni barpo etish orqali xotin-qizlarning jamiyatdagi faolligini oshirish muhimligi yuzasidan koʻrsatma bergan edi, — deydi Oʻzbekiston Respublikasi Oila va xotin-qizlar qoʻmitasi boʻlim boshligʻi Mavludaxon Nizomova. — Koʻrsatma ijrosi sifatida qad rostlagan bu bino tuman xotin-qizlarining eng ishonchli maskaniga aylanadi. Bu yerda opa-singillarimizning ham hayotda, ham jamiyatda munosib oʻrin egallashlari uchun barcha qulayliklar yaratilgan. Jumladan, turli yoʻnalishlar boʻyicha oʻquv kurslari, huquqiy va psixologik maslahatxona, kasb-hunarga oʻrgatish markazlari faoliyat yuritmoqda. “Yosh onalar maktabi”, “Oila kutubxonasi”, “Ona va bola” xonalari, sport va fitnes mashgʻulotlari ham tashkil etilgan.