Фото: Reuters

Венгрия бош вазири Виктор Орбаннинг Украинадаги можарони ҳал қилиш бўйича тинчлик режаси Европа Иттифоқини барча давлатлари етакчиларининг столида турибди.

Бу ҳақда ҳукумат раҳбарининг сиёсий директори Балаж Орбан «Magyar Nemzet» газетасига берган интервьюсида айтиб ўтди. «Вазиятни реал баҳолаш, реал мақсадлар ва мос вақт жадвали — мана бизнинг ёндашувимиз нимага асосланади», дея қўшимча қилган сиёсатчи.

Расмийнинг сўзларига кўра, Венгриянинг ролини ортиқча баҳоламаслик лозим, аммо Орбан икки ҳафта ичида дунёнинг аксарият давлатлари йиллар давомида кутган бир нечта учрашувларни ўтказишга муваффақ бўлганини эътибордан четда қолдирмаслик керак.

Балаж Орбаннинг таъкидлашича, Будапешт Европа Иттифоқига раислигининг бутун даврини «тинчлик музокаралари учун шарт-шароит яратиш учун сарфлайди ва сиёсий ташаббусларни» кўриб чиқади.

«Венгрия бош вазири Европа Иттифоқи раҳбарларига ўзининг ташрифлари ҳақида батафсил маълумот берди. Бу сафарлар жуда муҳим эди, чунки айни дамда мамлакатимиз урушаётган томонлар ва энг муҳим воситачи ўйинчилар қандай фикрда экани, турли манфаатлар ўртасида қандай маневр қилиш мумкинлиги ҳақида янги ва аниқ маълумотларга эга бўлган ягона давлатдир», дейди сиёсатчи.

Унинг сўзларига кўра, агар Европа тинчликка жиддий ёндашса, у «ҳеч бўлмаганда амалга ошириш имконияти минимал» бўлган режани яратиши мумкин.

Виктор Орбан 5 июль куни Москвага келди ва Владимир Путин билан учрашди. У Москвага ташрифни 2 июль куни Киевга сафари билан бошланган тинчлик миссиясининг навбатдаги босқичи, деб атади. Венгрия бош вазири Киевда Украина президенти Владимир Зеленский билан музокара ўтказганди.

Кейин Орбан Пекинга ташриф буюриб, Хитой раҳбари Си Цзиньпин билан учрашди. Шундан сўнг НАТО саммитида қатнашиш учун Вашингтонга жўнаб кетди ва унинг доирасида Туркия президенти Режеп Таййип Эрдоған билан мулоқот қилди. Кейин эса Орбан Флоридада АҚШнинг собиқ президенти Доналд Трамп билан учрашди.

Хитойга ташрифи ортидан Венгрия бош вазири Украина атрофидаги инқирозни можаро томонлари ҳал қилиши кераклигини, бироқ унинг тугашига АҚШ, Хитой ва Европа Иттифоқи ҳал қилувчи таъсир кўрсатишини айтганди.

Россия президенти матбуот котиби Дмитрий Песковнинг айтишича, Орбан мулоқот учун сиёсий иродасини намоён этган, Москва буни жуда ижобий ва фойдали, деб ҳисоблайди.

Европа дипломатияси ташқи сиёсат раҳбари Жозеп Боррелнинг таъкидлашича, Венгрия Европа Иттифоқи Кенгашига олти ой раис бўлганига қарамай, Орбан Европа Иттифоқига ташқи майдонда вакиллик қилмайди ва Россияга ташриф буюриш учун Европа мандатига эга эмас.

Орбан Боррелнинг танқидига жавобан Украинада тинчлик ўрнатишга қаратилган саъй-ҳаракатлар «Брюссел бюрократларининг делирюми (фикрлаш ва хатти-ҳаракатлардаги кескин, тўсатдан ўзгариш)» туфайли муваффақиятсизликка учраганини айтди.