Вержил Ортис Мадримов билан бўлган тўқнашувга изоҳ бериб, рақибининг фаол ҳаракат қилганини, бироқ самарали зарбалар бера олмаганини таъкидлади. Бу ҳақда «DAZN Sports» нашри хабар берди.

«У жуда кўп ҳаракат қилди, лекин зарба беролмади. Албатта, Мадримов мендек босим ўтказмади. Жанг ўртача темпда кечди, бироқ у менга кучли зарар етказган деб ўйламайман», — деди Ортис.

Шунингдек, америкалик боксчи ҳакамларнинг баҳоларига ҳам изоҳ бериб, ўзининг устунлигини алоҳида қайд этди. «Баъзи ҳакамларнинг карталарида жанг жуда яқин бўлгандек кўрсатилди, лекин мен учун ундай эмас. Мен ўз режам бўйича ҳаракат қилдим, Мадримов менга кучли зарба бера олмади. Ўзимга ушбу жанг учун энг юқори баҳо (5) қўяман», — дея таъкидлади Ортис.

Қайд этиш керакки, 23 феврал куни америкалик боксчи Вержил Ортис (23−0, 21 КО) ўзбекистонлик Исроил Мадримов (10−1−2, 7 КО) устидан ҳакамларнинг бир овоздан қабул қилинган қарорига кўра (117−111, 115−113, 115−113) ғалаба қозонганди.

Гарчи натижа Вержил Ортис фойдасига ҳал бўлган бўлса-да, Исроил Мадримов ҳам кучли қаршилик кўрсатганди. Ўзбекистонлик боксчи жанг давомида аниқ зарбалар йўллашга ҳаракат қилган бўлса-да, рақибининг доимий босими унинг тактикасига таъсир кўрсатди. Мадримов ўзининг тезкорлиги ва техник маҳоратини намойиш этди, бироқ якунда ҳакамлар қарорига кўра мағлубиятга учраганди.