Фото: Reuters

Ўзбекистон Республикаси мудофаасига кўмаклашувчи «Ватанпарвар» ташкилотининг автомотоспорт бўйича мураббийи ва миллий тоифадаги ҳаками Мубаширхон Жўраев жорий йилнинг 9-13 июнь кунлари ташкил этиладиган «Формула-1» пойгаларининг Озарбайжон Гран-присига ҳакам сифатида таклиф этилди. Бу ҳақда Ўзбекистон Республикаси мудофаасига кўмаклашувчи «Ватанпарвар» ташкилоти Матбуот хизмати хабар бермоқда.

Ушбу нуфузли мусобақада германиялик Себастян Феттел, англиялик Льюис Хемилтон, нидерландиялик Макс Ферстаппен каби бир қатор таниқли пойгачи спортчилар ўзаро беллашиши кутилмоқда. Мусобақа Боку трассасида бўлиб ўтади.

Мубаширхон Жўраев 1974 йилда Наманган вилоятида туғилган. Айни пайтда «Ватанпарвар» ташкилоти вилоят кенгаши автоспорт секциясининг мураббийи вазифасида фаолият юритиб келмоқда. Мотокросс, автокросс ва картинг спорт турлари бўйича ўтказиладиган республика чемпионатларида кўп маротаба бош ҳакамлик қилиб келган.

«Ватанпарвар» ташкилотининг спортчилари нафақат республика, балки МДҲ, Осиё ва жаҳон чемпионатларида юқори ўринларни эгаллаб, мамлакатимиз нуфузи, обрў-эътибори ошишига салмоқли ҳисса қўшмоқдалар.

Эслатиб ўтамиз, жорий йилнинг май ойида Германиянинг Зул шаҳрида спортнинг ўқ отиш тури спорти бўйича ёшлар ўртасида ўтказилган Жаҳон кубоги мусобақасида иштирок этган «Ватанпарвар» ташкилоти Наманган вилояти кенгашининг пневматик қуролдан ўқ отиш секцияси аъзоси, 18 ёшли Муҳаммад Камолов 10 метр масофага тўппончадан отиш мусобақасида муносиб иштирок этиб, 3-ўринни эгаллади. У, ўтган 2021 йилнинг центабр ойида Россиянинг Қозон шаҳрида бўлиб ўтган биринчи МДҲ давлатлари ўйинларининг пневматик милтиқдан ўқ отиш мусобақасида олтин ҳамда Қозоғистоннинг Чимкент шаҳри мезбонлик қилган XXIV Осиё чемпионатида кумуш ва бронза медалларига сазовор бўлган.

Бундан ташқари, жорий йилнинг май ойида Қозоғистон Республикасида картинг бўйича ўсмирлар ўртасида ўтказилган чемпионатнинг биринчи босқичида «Ватанпарвар» ташкилоти Наманган вилояти кенгашининг картинг спорти секцияси спортчиси, 14 ёшли Ясмина Эгамбердиева «OK-junior» синфида биринчи ўринни эгаллади. Шунингдек, «Ватанпарвар» ташкилоти Тошкент шаҳар кенгаши тасарруфидаги Яшнобод тумани Ўқув спорт техник клубининг картинг спорти секцияси спортчиси, 11 ёшли Амир Ҳамроев ушбу мусобақанинг «Супер-мини» синфида беллашиб, ғолибликни қўлга киритди.