Foto: Reuters

Oʻzbekiston Respublikasi mudofaasiga koʻmaklashuvchi “Vatanparvar” tashkilotining avtomotosport boʻyicha murabbiyi va milliy toifadagi hakami Mubashirxon Joʻrayev joriy yilning 9-13-iyun kunlari tashkil etiladigan “Formula-1” poygalarining Ozarbayjon Gran-prisiga hakam sifatida taklif etildi. Bu haqda Oʻzbekiston Respublikasi mudofaasiga koʻmaklashuvchi “Vatanparvar” tashkiloti Matbuot xizmati xabar bermoqda.

Ushbu nufuzli musobaqada germaniyalik Sebastyan Fettel, angliyalik Lyuis Xemilton, niderlandiyalik Maks Ferstappen kabi bir qator taniqli poygachi sportchilar oʻzaro bellashishi kutilmoqda. Musobaqa Boku trassasida boʻlib oʻtadi.

Mubashirxon Joʻrayev 1974-yilda Namangan viloyatida tugʻilgan. Ayni paytda “Vatanparvar” tashkiloti viloyat kengashi avtosport seksiyasining murabbiyi vazifasida faoliyat yuritib kelmoqda. Motokross, avtokross va karting sport turlari boʻyicha oʻtkaziladigan respublika chempionatlarida koʻp marotaba bosh hakamlik qilib kelgan.

“Vatanparvar” tashkilotining sportchilari nafaqat respublika, balki MDH, Osiyo va jahon chempionatlarida yuqori oʻrinlarni egallab, mamlakatimiz nufuzi, obroʻ-eʼtibori oshishiga salmoqli hissa qoʻshmoqdalar.

Eslatib oʻtamiz, joriy yilning may oyida Germaniyaning Zul shahrida sportning oʻq otish turi sporti boʻyicha yoshlar oʻrtasida oʻtkazilgan Jahon kubogi musobaqasida ishtirok etgan “Vatanparvar” tashkiloti Namangan viloyati kengashining pnevmatik quroldan oʻq otish seksiyasi aʼzosi, 18 yoshli Muhammad Kamolov 10 metr masofaga toʻpponchadan otish musobaqasida munosib ishtirok etib, 3-oʻrinni egalladi. U, oʻtgan 2021-yilning sentabr oyida Rossiyaning Qozon shahrida boʻlib oʻtgan birinchi MDH davlatlari oʻyinlarining pnevmatik miltiqdan oʻq otish musobaqasida oltin hamda Qozogʻistonning Chimkent shahri mezbonlik qilgan XXIV Osiyo chempionatida kumush va bronza medallariga sazovor boʻlgan.

Bundan tashqari, joriy yilning may oyida Qozogʻiston Respublikasida karting boʻyicha oʻsmirlar oʻrtasida oʻtkazilgan chempionatning birinchi bosqichida “Vatanparvar” tashkiloti Namangan viloyati kengashining karting sporti seksiyasi sportchisi, 14 yoshli Yasmina Egamberdiyeva «OK-junior» sinfida birinchi oʻrinni egalladi. Shuningdek, “Vatanparvar” tashkiloti Toshkent shahar kengashi tasarrufidagi Yashnobod tumani Oʻquv sport texnik klubining karting sporti seksiyasi sportchisi, 11 yoshli Amir Hamroyev ushbu musobaqaning «Super-mini» sinfida bellashib, gʻoliblikni qoʻlga kiritdi.