АҚШнинг янги президенти Дональд Трамп Украина урушини тезда якунлаш учун Владимир Путинга қўнғироқ қилишни режалаштирмоқда. Бу ҳақда Трампнинг собиқ махсус вакили Курт Волкер маълум қилди. Унинг сўзларига кўра, Трамп Путинга урушни тўхтатиши кераклигини айтишни хоҳлайди. Бу ҳақда «Newsweek» хабар берди.

Қайд этилишича, Трампнинг қайта сайланиши АҚШнинг Украинага кўрсатадиган ёрдамига қандай таъсир қилиши мавҳумлигича қолмоқда. Волкернинг фикрича, Путин Трамп учун «айёр рақиб» бўлиб, у келишувга интилмайди, аксинча, Украина устидан тўлиқ назоратни қўлга киритишни истайди. «Трамп Путинга урушни давом эттириш унга қимматга тушишини кўрсатиши керак бўлади», дейилади хабарда.

Волкер Трампнинг таклиф қилиши мумкин бўлган усуллардан бири энергия бозорига арзон нефт ва газни чиқариш орқали Путиннинг бюджетига зарар етказиш эканини айтган. Бошқа бир йўл эса, Украинага Америка қуролларини сотиб олиш учун маблағ ажратишга имкон берадиган «lend-lease» дастурини қўллашдир. Волкернинг айтишича, бу дастур орқали Украинага катта маблағ берилиши Путинни урушда ғалаба қозона олмаслигига ишонтириши мумкин.

Маълум бўлишича, Трамп ўз лавозимини 20 январга қадар эгаллайди ва бу вақтда Украина – Россия конфликти бошланганига деярли 3 йил тўлади. Айрим экспертларнинг фикрича, Трамп Путин билан яқин муносабатда бўлишга мойиллиги, Кремл ундан ўз манфаатлари йўлида фойдаланиши мумкинлигига ишора ҳам бўлиши мумкин.

Шунингдек, Трампнинг атрофидаги манбалар урушни тўхтатиш учун Украинани НАТО аъзолигига кириш муддатини 20 йилга кечиктиришни таклиф қилмоқда. Улар, шунингдек, шарқий ҳудудларда демилитаризация зонасини яратиш ва уруш чизиғини сақлаб қолишни кўзда тутмоқда. Шу билан бирга, АҚШ Европа иттифоқи мамлакатларини бу ҳудудда хавфсизликни таъминлаш учун қўшин юборишга чақириши мумкин.

Бундан ташқари, Трамп урушни Америка учун катта стратегик масала деб ҳисобламаса, Украина ёрдамдан маҳрум бўлиши эҳтимоли ҳам мавжуд. Трампнинг бу борадаги қарори Европа ва Россия ўртасидаги кучлар мувозанатига сезиларли таъсир кўрсатиши ҳам эҳтимолдан йироқ эмас. Ҳозирча бирорта расмий сиёсий йўналишни очиқламаган.

Аввалроқ, юридик шахслар сони ярим миллиондан ошгани ҳақида хабар берилганди.