Ижтимоий тармоқларда Тошкент шаҳри Учтепа туманида автомобиль ёниб кетганлиги тўғрисида хабарлар тарқалди. Мазкур ҳолат юзасидан Тошкент шаҳар Фавқулодда вазиятлар бошқармаси муносабат билдирди.

Унда айтилишича, бугун, 15 сентябрь куни соат 00:23 да Тошкент шаҳар Учтепа тумани, Шафтолизор кўчасида ҳаракатланиб кетаётган автомобилда йўл транспорт ҳодисаси содир бўлган. Натижада автомобилда ёнғин келиб чиққан.

Мазкур ҳолат юзасидан ёрдам зарурлиги тўғрисида пойтахт Фавқулодда вазиятлар бошқармасига мурожаат келиб тушган. Ушбу мурожаатга асосан ёнғин-қутқарув техникалари айтилган манзилга соат 00:30 да етиб борган ва ёнғин соат 00:36 да тўлиқ ўчирилган.

Тошкент шаҳар Фавқулодда вазиятлар бошқармаси маълумотларига кўра, мазкур ёнғин оқибатида тан жароҳати олганлар аниқланмаган.

Эслатиб ўтамиз, аввалроқ, Андижон туманида жойлашган автомобилларга суюлтирилган ва сиқилган газ тўлдириш шохобчаси ҳудудида «MAN» русумли ёқилғи ташувчи автомобили цистернасидан пропан суюлтирилган газни тўкиш вақтида технологик жараён бузилиши оқибатида ёнғин келиб чиққан эди.