Ijtimoiy tarmoqlarda Toshkent shahri Uchtepa tumanida avtomobil yonib ketganligi toʻgʻrisida xabarlar tarqaldi. Mazkur holat yuzasidan Toshkent shahar Favqulodda vaziyatlar boshqarmasi munosabat bildirdi.

Unda aytilishicha, bugun, 15-sentyabr kuni soat 00:23 da Toshkent shahar Uchtepa tumani, Shaftolizor koʻchasida harakatlanib ketayotgan avtomobilda yoʻl transport hodisasi sodir boʻlgan. Natijada avtomobilda yongʻin kelib chiqqan.

Mazkur holat yuzasidan yordam zarurligi toʻgʻrisida poytaxt Favqulodda vaziyatlar boshqarmasiga murojaat kelib tushgan. Ushbu murojaatga asosan yongʻin-qutqaruv texnikalari aytilgan manzilga soat 00:30 da yetib borgan va yongʻin soat 00:36 da toʻliq oʻchirilgan.

Toshkent shahar Favqulodda vaziyatlar boshqarmasi maʼlumotlariga koʻra, mazkur yongʻin oqibatida tan jarohati olganlar aniqlanmagan.

Eslatib oʻtamiz, avvalroq, Andijon tumanida joylashgan avtomobillarga suyultirilgan va siqilgan gaz toʻldirish shoxobchasi hududida “MAN” rusumli yoqilgʻi tashuvchi avtomobili sisternasidan propan suyultirilgan gazni toʻkish vaqtida texnologik jarayon buzilishi oqibatida yongʻin kelib chiqqan edi.