Тошкентда 20 ёшли йигит пенсионер аёлга тегажоғлик қилиш учун 10 минг сўм таклиф қилди. Тошкент шаҳар ички ишлар бошқармаси вазиятга изоҳ берди.

11 сентябрь куни пойтахтнинг Чилонзор туманида номақбул воқеа содир бўлган. 63 ёшли аёл эрталаб кўчада сайр қилаётган чоғда, унга тегажоғлик қилиш учун 10 000 сўм таклиф қилган йигитга дуч келди.

«Онахон, келинг сизга бир тегинай, 10 минг сўм бераман», - деб айтган йигит.

Нафақахўр алкоголь ҳиди аниқ сезилиб турган беадаб йигитдан яширинишга уринган. Аёл кўп қаватли уйнинг кираверишига югуриб кирган, бироқ йигит уни қувиб етади. Нафақахўр ёрдам чақирмоқчи бўлган, бироқ ҳуқуқбузар унга қарата «Жим бўл, ўлдираман» деб бақира бошлаган. Йигит бошлаган ишини охирига етказа олмаган, қичқириқни эшитган маҳаллий аҳоли ўртага аралашган.

Бир неча кундан кейин ички ишлар органларига 63 ёшли аёл ариза билан мурожаат қилган.

Ҳуқуқ-тартибот ходимлари кекса аёлни ҳақорат қилган эркакнинг шахсини аниқлади. Бу 2001 йилда туғилган йигит бўлиб чиқди. Унга нисбатан 277-модда («Безорилик») билан жиноят иши қўзғатилган. Ҳозирда тергов ҳаракатлари олиб борилмоқда. Текширув натижаларига кўра қонуний қарор қабул қилинади.