Тошкент метрополитенида нақд пул билан ишлайдиган айрим кассалар ёпилмоқда. Бу ҳақда метрополитен матбуот хизмати хабар берди.

Қайд этилишича, ҳозирда метро хизматидан фойдаланишда йўл ҳақини тўлашнинг 10 дан ортиқ тури мавжуд. Жумладан, QR-кодли бир марталик чипталар 3000 сўмни ташкил қилса, бошқа тўлов усуллари 1700 сўм ва ундан ҳам арзон. Шуни инобатга олиб, ҳозирги вақтга келиб йўловчиларнинг кам сонли қисмигина нақд пул кўришида яъни кассадан ҚР-кодли чипта харид қилиб йўл ҳақини тўлашмоқда.

Рақамларга қараладиган бўлса, илгари бир марталик QR-кодли чипталардан метро йўловчиларининг 45-50 фоиз фойдаланган бўлса, ҳозирги вақтга келиб қарийб 6-7 фоизни ташкил қилмоқда.

Узоқ вақт давом этган кузатув ва ўрганишлар натижаларига кўра бир қанча метро бекатларидаги вестибюлларда жойлашган кассаларда чипталар харид қилиниш кўрсатгичи кескин камайгани аниқланган.

Шу боис, нақд пул кўринишида тўловни амалга оширувчи йўловчилар сони кам бўлган 13 та метро бекатларининг (Мирзо Улуғбек, Халқлар дўстлиги, Пахтакор, Ҳамид Олимжон, Пушкин, Дўстлик, Тошкент, Ойбек, Тинчлик, Шаҳристон, Бодомзор, Минор ҳамда Абдулла Қодирий ) 1 тадан вестибюлларидаги кассалар ёпилган. Шунингдек, ушбу вестибюлларга чипта сотиб олиш учун автоматлаштирилган банкоматлар синов тариқасида ўрнатилмоқда.

Шунингдек, метро йўловчилари касса ёпилган вестибюлларда ҳам автоматлаштирилган тўлов турларининг бошқа усуллари орқали тўлов қилиш имкониятига эгалар. (АТТО карталари, банк карталари, турли мобил иловалар, кафт орқали ва бошқа тўлов усуллари).

Таъкидланишича, юқоридаги тўлов усулларининг афзалликларидан яна бири йўловчилар вақтини тежаш яъни касса олдида навбат кутмасдан, қолаверса, метрода йўл ҳақини арзон тарифда тўлашларини ташкил этишдир.