Пойтахтимиздаги сув спорти турларига қарашли Республика олий спорт маҳорати мактабининг сузиш ҳавзасида сув полоси бўйича 2006-2007 йилларда таваллуд топган спортчилар ўртасида ўтказилган мамлакат чемпионати баҳслари ниҳоясига етди.

Мусобақанинг сўнгги куни қизлар жамоалари ўртасида бўлиб ўтган баҳсларда икки пешқадам Тошкент шаҳри ва Наманган вилояти вакиллари ўзаро куч синашдилар. Учрашувда сезиларли устунликка эга бўлган пойтахтлик ватерполчи қизлар якунда 9:4 ҳисобида ғалаба қозондилар.

Ўсмирлар ўртасида бўлиб ўтган мусобақада Тошкентнинг «Гермес» спорт клуби Қозоғистон жамоасига бир тўп фарқи билан 8:9 ҳисобида мағлуб бўлган бўлса, Тошкент шаҳри жамоаси сирдарёлик сув полоси усталарини 26:7 ҳисобида енгди.

Тошкент шаҳридаги биринчи ва иккинчи сон Болалар ва ўсмирлар спорт мактаби жамоаларининг ўзаро баҳси 6:4 ҳисобида 2-сон БЎСМ жамоаси фойдасига ҳал бўлди. Наманган вилояти ҳамда Республика олий спорт маҳорати мактаби жамоалари ўртасидаги учрашув сўнгги дақиқаларга қадар муросасиз рухда кечиб, 9:8 ҳисобида наманганлик ватерполчиларнинг ғалабаси билан якун топди.

Шундай қилиб қарийиб бир ҳафта давом этган мамлакат чемпионати баҳсларининг якунларига кўра қизлар орасида Тошкент шаҳри жамоаси фахрли биринчи ўринни эгаллади. Наманган вилояти вакиллари иккинчи, сув спорти турларига қарашли Республика олий спорт маҳорати мактаби жамоаси учинчи ўринларни банд этишди.

Ўсмирлар ўртасидаги мусобақада эса Наманган вилояти жамоаси олтин медални қўлга киритди. Республика олий спорт маҳорати мактаби жамоаси кумуш, Тошкент шаҳри ватерполчилари эса бронза медалига сазовор бўлдилар.

Мусобақалар сўнггида барча ғолиб ва совриндорларга ташкилотчилар томонидан таъсис этилган медаль ва эсдалик совғалари тантанали суратда топширилди.