Фарҳод ЭСОНОВ/«Халқ сўзи». Малайзиянинг Куала-Лумпур шаҳрида «AITEX» Осиё зиёрат туризми ва савдо кўргазмаси бўлиб ўтди. Унда мамлакатимиздан Тошкент шаҳри, Бухоро, Хоразм, Самарқанд вилоятлари қаторида сурхондарёлик делегация ҳам фаол қатнашиб, ҳудуднинг туризм салоҳиятига бағишланган тақдимотларини ўтказди. Тақдимотда 50 га яқин давлатдан туризм соҳаси вакиллари иштирок этди.

— Мамлакатимиз учун ажратилган павильондан жой олган кўргазмамизни барча иштирокчилар катта қизиқиш билан томоша қилди, — дейди вилоят туризм бошқармаси бошлиғи Жўрабек Тўраев. — Нафақат буюк аждодларимиз мангу қўним топган муқаддас қадамжолар, балки миллий ҳунармандлигимиз, гастрономик туризм ва ўтмишдан сақланиб қолган миллий қадриятларимиз, хушманзара табиат манзараларимиз ҳам манзур бўлди. Термизийлар ҳаёти ва илмий меросини ўрганиш ҳамда туристик йўналишларда меморандумлар имзоланди.

Кўргазма доирасида Ўзбекистоннинг Малайзиядаги элчиси Каромидин Гадоев мамлакатимизнинг туризм салоҳиятига бағишланган тақдимотлар, туризм соҳасида олиб борилаётган кенг қамровли ислоҳотлар, зиёрат туризмини изчил ривожлантириш ва зиёратчилар учун қулай шарт-шароит яратиш юзасидан амалга оширилаётган ишларга бағишланган тақдимотлар ўтказди.