Шу кунларда Сирдарё вилоятида сув исрофгарчилигига сабаб бўлаётган тупроқ ўзанли канал ҳамда ички суғориш тармоқларини таъмирлаш, реконструкция қилиш борасида ишлар кўлами кенгайиб бормоқда.

Ушбу муҳим ишга Қуйи Сирдарё ирригация тизимлари ҳавза бошқармаси тизимидаги ирригатор ва мелиораторлар билан биргаликда фермер хўжаликлари ҳамда кластерларнинг ишчи хизматчилари, техника воситалари ҳам жалб этилди. Кўкламги экиш мавсумигача бажарилиши мўлжалланган иш кўлами анча улкан, яъни вилоятдаги мавжуд 2245,6 километр тупроқ ўзанли ички суғориш тармоқларининг 900 километрлик қисмини ўтган йилнинг декабрь, жорий йилнинг январь, февраль, март ойлари давомида бетонлаштириш белгиланган.

— Амалга оширилаётган мазкур ишлар натижасида вилоятимиз бўйича йилига 85 миллион куб-метр сув иқтисод қилиниб, қарийб 24 минг гектардан ошиқ қишлоқ хўжалиги экин майдонларининг сув таъминоти яхшиланишига, кучли ва ўртача шўрланган майдонлар камайишига, сизот сувлар сатҳи ер юзасига яқин жойлашган майдонлар қисқаришига, мелиоратив ҳолати ёмон бўлган ер майдонларининг ҳолатини барқарор сақлашга эришилади, — дейди Қуйи Сирдарё ирригация тизимлари ҳавза бошқармаси бошлиғи Шавкат Исроилов. — Шунингдек, каналларнинг бетонлаштирилиши ҳисобига сув ресурслари билан бирга катта миқдордаги маблағ ҳам тежалади.

Аҳмадали ШEРНАЗАРОВ, “Халқ сўзи”.