Фото: dzen.ru

Россия Хавфсизлик Кенгаши котиби Сергей Шойгу расмий ташриф билан Афғонистонга келди. У ерда у мамлакатни бошқараётган Толибон раҳбарияти билан учрашувлар ўтказди ва Москва-Кобул ҳамкорлигини барча йўналишларда ривожлантириш режаларини эълон қилди. Учрашувлар давомида асосан иқтисод, транспорт ва хавфсизлик масалалари муҳокама қилинган. Бу ҳақда DW нашри хабар берди.

Маълум бўлишича, Шойгу Афғонистон ҳукумати фаолиятини ижобий баҳолаб, мамлакатнинг сўнгги йиллардаги ўзгаришларини алоҳида эътироф этди. У Россиянинг Афғонистон билан конструктив сиёсий мулоқот ўрнатишга тайёрлигини билдирди. Шунингдек, бу мулоқот ички афғон келишув жараёнларини ривожлантиришга ҳам ҳисса қўшиши мумкинлигини билдирган.

Афғонистондаги «Alemarah» ахборот портали хабарига кўра, Шойгу Толибонни Россиянинг террорчи ташкилотлар рўйхатидан чиқариш имкониятини муҳокама қилди. Бу қадам Москва ва Кобул ўртасидаги сиёсий ва иқтисодий алоқаларни янада мустаҳкамлашга хизмат қилиши мумкин. Россия расмийлари аввалроқ бу жараёнга оид ҳуқуқий ишларни бошлаганини эълон қилган эдилар.

Владимир Путиннинг Афғонистон бўйича махсус вакили Замир Кабулов ҳам шу йил октябр ойида Толибонни террорчилар рўйхатидан чиқариш ҳақида гапирганди. Унга кўра, Россия ҳукумати бу қарорни амалга ошириш учун барча зарур ҳуқуқий жараёнларни олиб боряпти. Кабуловнинг таъкидлашича, қарор Россиянинг ҳуқуқий майдонига мувофиқ равишда қабул қилинади.

Шойгунинг ташрифи Толибон билан янада яқин муносабатларни ўрнатиш учун Москва томонидан қўйилган катта сиёсий қадам бўлиб, бу жараёнда хавфсизлик, иқтисодий ривожланиш ва транспорт лойиҳалари марказий ўрин тутади. Хусусан, Россия Афғонистонда янги транспорт инфратузилмасини яратишда иштирок этишни режалашгани маълум қилинган. Бу айниқса, мамлакатнинг минтақадаги иқтисодий изоляциясини юмшатиши мумкин.

Толибон билан ҳамкорликнинг янада мустаҳкамланиши Афғонистон учун ҳам муҳим. Бу жараёнда Россия Афғонистонга ўз сиёсий ва иқтисодий қўллаб-қувватлашини оширишни таклиф қилади. Шойгу бу мулоқотларни фақат икки мамлакат манфаатлари эмас, балки минтақавий барқарорлик учун ҳам муҳим деб баҳолади.