Foto: dzen.ru

Rossiya Xavfsizlik Kengashi kotibi Sergey Shoygu rasmiy tashrif bilan Afgʻonistonga keldi. U yerda u mamlakatni boshqarayotgan Tolibon rahbariyati bilan uchrashuvlar oʻtkazdi va Moskva-Kobul hamkorligini barcha yoʻnalishlarda rivojlantirish rejalarini eʼlon qildi. Uchrashuvlar davomida asosan iqtisod, transport va xavfsizlik masalalari muhokama qilingan. Bu haqda DW nashri xabar berdi.

Maʼlum boʻlishicha, Shoygu Afgʻoniston hukumati faoliyatini ijobiy baholab, mamlakatning soʻnggi yillardagi oʻzgarishlarini alohida eʼtirof etdi. U Rossiyaning Afgʻoniston bilan konstruktiv siyosiy muloqot oʻrnatishga tayyorligini bildirdi. Shuningdek, bu muloqot ichki afgʻon kelishuv jarayonlarini rivojlantirishga ham hissa qoʻshishi mumkinligini bildirgan.

Afgʻonistondagi “Alemarah” axborot portali xabariga koʻra, Shoygu Tolibonni Rossiyaning terrorchi tashkilotlar roʻyxatidan chiqarish imkoniyatini muhokama qildi. Bu qadam Moskva va Kobul oʻrtasidagi siyosiy va iqtisodiy aloqalarni yanada mustahkamlashga xizmat qilishi mumkin. Rossiya rasmiylari avvalroq bu jarayonga oid huquqiy ishlarni boshlaganini eʼlon qilgan edilar.

Vladimir Putinning Afgʻoniston boʻyicha maxsus vakili Zamir Kabulov ham shu yil oktyabr oyida Tolibonni terrorchilar roʻyxatidan chiqarish haqida gapirgandi. Unga koʻra, Rossiya hukumati bu qarorni amalga oshirish uchun barcha zarur huquqiy jarayonlarni olib boryapti. Kabulovning taʼkidlashicha, qaror Rossiyaning huquqiy maydoniga muvofiq ravishda qabul qilinadi.

Shoyguning tashrifi Tolibon bilan yanada yaqin munosabatlarni oʻrnatish uchun Moskva tomonidan qoʻyilgan katta siyosiy qadam boʻlib, bu jarayonda xavfsizlik, iqtisodiy rivojlanish va transport loyihalari markaziy oʻrin tutadi. Xususan, Rossiya Afgʻonistonda yangi transport infratuzilmasini yaratishda ishtirok etishni rejalashgani maʼlum qilingan. Bu ayniqsa, mamlakatning mintaqadagi iqtisodiy izolyatsiyasini yumshatishi mumkin.

Tolibon bilan hamkorlikning yanada mustahkamlanishi Afgʻoniston uchun ham muhim. Bu jarayonda Rossiya Afgʻonistonga oʻz siyosiy va iqtisodiy qoʻllab-quvvatlashini oshirishni taklif qiladi. Shoygu bu muloqotlarni faqat ikki mamlakat manfaatlari emas, balki mintaqaviy barqarorlik uchun ham muhim deb baholadi.