Шахмат бўйича Чехиянинг Прага шаҳрида ташкил этилган халқаро турнир ўз якунига етди. Швейцарча тизимда ўтказилган мусобақада дунёнинг 8та давлатидан 10 нафар гроссмейстер иштирок этди. Улар сафида ҳамюртимиз, рапид йўналиши бўйича энг ёш жаҳон чемпиони Нодирбек Абдусатторов ҳам ғолиблик учун дона сурди.

8-турдан кейин Нодирбек 5,5 очко жамғарган ҳолда пешқадамлар сафидан жой олиб турганди. Ҳал қилувчи 9-турда у словакиялик Пехас Жергус билан дуранг ўйнади. Бундан эса Германия вакили Винсент Кеймер ҳамда америкалик Ханс Ниеманн унумли фойдаланиб қолишди. Улар ўз рақиблари устидан ғалабага эришди ва Абдусатторовни 0,5 очкога ортда қолдирди.

Якуний натижаларга кўра Кеймар 6,5 очко билан мусобақа ғолиблигини қўлга киритди. АҚШ вакили Ханс Ниеманн ҳам шунча очко жамғарди, аммо қўшимча коэффисиентларга кўра Германия вакили 1-ўринга лойиқ кўрилди.

9 имкониятдан 6 очко жамғарган Нодирбек Абдусатторов эса кучли учликка якун ясаб берди.

Таъкидлаш жоиз, Прагадаги халқаро турнирнинг 1-тартиб рақамли иштирокчиси – АҚШлик Ханс Ниеманн бўлиб, у 2 678 рейтинг очкосига эга. Германиялик Винсент Кеймар эса 2 675 очко билан иккинчи тартиб рақамида сараланган. Ҳамюртимиз Нодирбек Абдусатторов эса 2 661 рейтинг очкоси билан халқаро турнирда 3-тартиб рақами билан рўйхатга олинган.