Фото: Шавкат Акрамов

Самарқанд давлат университети спорт фаолияти ва санъат факультети талабаси Нилуфар Полвонова, қўл жанги спорти бўйича Жаҳон ва икки карра Ўзбекистон чемпиони, Ўзбекистон миллий терма жамоаси аъзоси.

У спортда эришган муваффақиятлари сири ҳақида қуйидагиларни сўзлаб берди:

— Беш йилдан буён ушбу спорт билан шуғулланаман. Ҳозирда спорт устаси, Жаҳон чемпиони Назир Муйинов мураббийлиги остида шуғулланиб келмоқдаман, — дейди Н. Полвонова. — Болалигимдан жанг машғулотларини севиб томоша қилардим. Ушбу қизиқиш мени спортга киришимга сабабчи бўлган. Ҳар бир ишнинг машаққати бўлганидек, спортчида ҳам улкан масъулият бор. 

Машғулот жараёнларида бир қатор қийинчиликларни енгишга тўғри келади. Бу учун сабр, матонат, мустаҳкам ирода ва доимо яқинларнинг далдаси керак бўлар экан. Ҳар гал жароҳат олганимда ота-онам спортни тарк этишимни қатъий талаб қилишган. Аммо, мен ҳаётимни спортсиз тасаввур қилолмайман. Кучли спортчиларга доим ҳавас билан қараганман, улар каби бўлишга интилганман. Ниятим холис экан буларга бирин-кетин эришяпман. 

Шу кунга қадар икки карра Ўзбекистон чемпиони бўлдим. 2019 йил қўл жанги бўйича Наргиза Нарзиқулова Белоруссияда ўтказилган Жаҳон чемпионатида кумуш медални қўлга киритган эди. Биз бир залда машғулот олиб борамиз. Айнан, мен шу кишидек Жаҳон чемпиони бўламан, деб ҳаракат қилдим, интилдим. 

Меҳнатларим самарасида 19-22 май Бухоро шаҳрида ўтказилган Жаҳон чемпионатида олтин медални қўлга киритдим. Финалда Қозоғистонлик рақибим билан жанг қилиб ғалаба қозонганимда, хурсандчилигимдан қувонч ёшларимни тўхтатолмадим. Мени қўллаб-қувватлаш учун кузатиб турган ота-онамнинг хурсандчилигини кўрганингизда эди, гўёки дунёга сиғмай кетишди.

Ўзбекистон давлат мадҳияси янграб, байроғимиз баланд кўтарилганида спортни тўғри танлаганимга ва шу юртнинг фарзанди эканлигимдан фахрландим, ғурурландим.

Бу ҳали бошланиши, келажакда ўз олдимга улкан мақсадларни қўйганман. Биринчи марта ўз юртимда Ватанимиз байроғини кўтардим. Энди эса жаҳон бўйлаб юрт байроғини кўтариб, унинг шарафини ҳимоя қилмоқчиман. Бунинг учун мен доим ҳаракатдаман…

СамДУ ахборот хизмати ходими Беҳруз Шамсиддинов ёзиб олди.