Ассалому алайкум, халқаро майдонда юз бераётган воқеа ва ҳодисаларнинг қисқача шарҳи «Халқ сўзи» ва «Народное слово» газеталарининг таҳлилий-информацион дастурида

Байден «отдан тушса ҳам эгардан тушмаяпти»

АҚШ президенти Жо Байден муваффақиятсиз сайловолди дебатидан сўнг демократ донорларини ноябрда бўлиб ўтадиган сайловларда ғалаба қозонишга ишонтирди.

81 ёшли президент шанба куни Нью-Йорк ва Нью-Жерсидаги бир қатор маблағ йиғиш тадбирларида қатнашди. Пайшанба куни ўтган дебат ҳақида гапирар экан «Мен муваффақиятли кечани ўтказмадим. Трамп ҳам яхши натижа қайд этгани йўқ. Мен сизга ваъда бераман биз бу сайловда ғалаба қозонамиз», — деган амалдаги президент.

Бир қанча демократларда сайлов олди баҳсидаги чиқишдан сўнг Байден тўғри номзодми ёки йўқми деган хавотирларни кучайтирган. Демократлар палатаси собиқ спикери Ненси Пелоси Байден яхши чиқиш қилмаганини айтган. Президент хавотирларни тушуниши лекин қаттиқроқ курашишга ваъда бергани маълум. Байденнинг яқин дўсти, собиқ президент Барак Обама ҳам ижтимоий тармоқларда мунозара кечаси яхши ўтмаганини ёзган.

Трамп эса ўз тарафдорларига дебат катта ғалаба олиб келганини таъкидлаган. «Жо Байденнинг муаммоси унинг ёшида эмас. Гап унинг малакасида. У қўпол ва қобилиятсиз», — деди 78 ёшли Трамп.

Аввалроқ қатор нашрлар Байден оиласи, жумладан, Байденнинг рафиқаси Жилл Байден, унинг синглиси Валери Байден, 85 ёшли Тед Кауфман, президентнинг узоқ йиллик дўсти ва доимий маслаҳатчиси, шунингдек, Оқ уй маслаҳатчиларининг кичик гуруҳи президенти сайловда қатнашишдан воз кечишга кўндирмоқ эканлигини ёзган эди.

Рус аскарлари Украинанинг иккита қишлоғини эгаллаб олди

Россия Мудофаа вазирлиги Донетск вилоятида жойлашган Спорное ва Новоалександровка қишлоқларини эгаллаб олганини маълум қилди.

Сўнгги ойларда Россия қўшинлари шарқда украин мудофаасини босқичма-босқич ёриб ўтаётгани айтилмоқда. Жумладан, Москва бир неча ҳафтадан бери Украина шарқидаги қишлоқларни назоратига олгани ҳақида ёзган. Кам сонли қўшин ва қуролга эга бўлган украиналиклар душман кучларининг ҳужумини қайтаришга ҳаракат қилмоқда.

Оккупация қилинган Очеретинонинг шимоли-ғарбий қисмида жойлашган Новоалександровка қишлоғи ҳозирда Москва назоратига ўтган. Кичик Спорное қишлоғи эса Донетск вилоятининг шимолида, қўшни Луганск вилояти билан чегара яқинида жойлашган.

НАТО ва Россия сув ости кемалари Болтиқ денгизида тўқнашди

Россиянинг икки сув ости кемаси НАТО кемалари билан Болтиқ денгизида тўқнаш келди.

Маълумотларга қараганда, ушбу инцидент НАТОнинг Болтиқ минтақасида ўз ҳарбий машғулотларини ўтказган пайтда содир бўлди. Финляндия ва Швециянинг НАТОга қўшилиши Болтиқ денгизининг ҳозирда «НАТО кўли» лақабини олишига сабаб бўлган эди. Россиянинг флоти жойлашган Калининград анклави ушбу можаро учун муҳим стратегик нуқтага айланди.

Болтиқбўйи машғулотлари НАТОнинг «Балтопс» ҳарбий машғулотлари доирасида бўлиб, унда Швеция биринчи марта иштирок этмоқда. Ушбу ҳарбий машқлар сув ости кемаларини аниқлаш ва денгиз миналарини тозалаш каби вазифаларни қамраб олади.

Эслатиб ўтамиз, ҳарбий машғулотлар 9 июлда бошланадиган Вашингтондаги НАТО саммити олдидан ўтказилмоқда.

Қирғизистондаги сел оқибатида 9 киши ҳалок бўлди

30 июнь куни Қирғизистоннинг Ўш вилоятида содир бўлган сел оқибатида 9 киши, жумладан, болалар ҳалок бўлди. Бу ҳақда мамлакат Фавқулодда вазиятлар вазирлиги хабар берган.

Дастлабки маълумотларга кўра, ҳалок бўлганларнинг олти нафари 8 ёшдан 19 ёшгача бўлган болалардир. Уларнинг барчаси бир оила вакиллари экани аниқланган.

Маълум бўлишича, қидирув тадбирларида 373 киши қатнашган.