Эрон пойтахти Теҳронда қурғоқчилик туфайли сув танқислиги фалокатли даражага етди. Мамлакат президенти Масуд Пезешкиён пойтахтни эвакуация қилиш мумкинлиги ҳақида огоҳлантирди. Бу ҳақида BILD нашри хабар берди.

«Агар ноябрь ойи охирига қадар Теҳронда ёмғир ёғмаса, биз сувни чегирма билан тақсимлашга ўтамиз. Ушбу чоралар ҳам вақтинчалик, бу орада ҳам ёмғир ёғмаса, пойтахтни эвакуация қилишга мажбур бўламиз», — дейди Пезешкиён.

Теҳрон сув бошқармаси вакили Беҳзад Парсанинг маълум қилишича, пойтахтнинг асосий ичимлик сув манбаи бўлган Амир Кабир сув омбори ҳисобланиб, айни вақтда унда атиги 14 миллион кубометр сув мавжуд. Бу ушбу сув омбори сиғимининг саккиз фоизини ташкил қилади. Бундай захира билан шаҳар ўзини узоғи билан икки ҳафта сув билан таъминлай олади.

Маълумот учун, Теҳрон аҳолиси 10 миллиондан ортиқ ва улар кунига тахминан 3 миллион кубометр сув истеъмол қилади. Харажатларни тежаш чораси сифатида, сўнгги кунларда Теҳроннинг бир нечта ҳудудларида сув таъминоти вақтинча узилгани ҳақида хабарлар бор.

Яқин Шарқ ва глобал тартибни ўрганиш маркази ўзининг сўнгги таҳлилий ҳисоботида Эроннинг сув инқирози фақатгина сув омборлари билан боғлиқ эмас, балки тобора камайиб бораётган ер ости сув қатламларига ҳам тааллуқли деган хулосага келган.

Мутахассисларнинг фикрига кўра, Теҳрондаги вазият ёмонлашишда давом этади. Сабаби Эрон раҳбарияти қурғоқчиликни олдини олиш учун инфратузилмаларга сармоя киритишга ҳаракат қилаётгани тўғрисида ҳеч қандай маълумотлар йўқ. Қўшимча қилинишича, сув билан боғлиқ вазият салбий сиёсий оқибатларга ҳам олиб келиши мумкин.